CEBU, Philippines – Gisusi sa mga sakop sa kapolisan sa Mandaue City Police Office (MCPO) ang kahimtang sa seguridad sa mga establisamento sa tuyo nga mapakgang ang mga dautang elemento sa paghimo sa ilang dautan nga mga plano nga naglakip sa pagpanglungkab, pagpangilad o pagpanulis.
Naglakip sa gisusi sa kapolisan ang pagpahimutang sa ilang mga security guard ug ang pagsiguro nga functional ang ilang mga CCTV cameras.
Si Police Senior Inspector Julian Entoma, director sa kapolisan sa MCPO maoy nangunay sa pagsusi niini human sa nagsunod nga mga sunog diin kasagaran sa mga nasunog, mga tindahan nga namaligya og petron products ilabi na sa Brgy. Canduman.
Lakip na niini ang pagpanulis diin matud sa kapolisan sa Presinto 6, duha ka lalaki nga nagsakay og motorsiklo nga nagsul-ob og helmet nakasakiyo og P6 mil.
Gitataw ni MCPO director Entoma nga iyang namatikdan nga sagad sa mga biktima mao kadtong wala magbutang og guwardiya diin luag kaayo ang seguridad.
Nagduda karon si Entoma nga ang mga kanhi binilanggo sa Mandaue City Jail nga nakapiyansa maoy ilang gituohan nga maoy nagpaluyo sa pagpanulis. (/DILT)(BANAT NEWS)