Bagong traffic scheme sa south posibleng ipatuman

CEBU, Philippines – Sa dili pa mabuksan ang P638-million underpass project diha sa Natalio Bacalso Avenue, ang Department of Public Works and Highways (DPWH)-7 mangayo sa Cebu City Transportation Office (CCTO) sa posibleng bag-ong traffic scheme diha sa south district.

Matud ni DPWH-7 project engineer Roy dela Cruz nga dili dayon sila makabukas sa underpass project nga walay “go signal” gikan sa traffic authority.

Ang proyekto kon makompleto na sa buwan sa Hunyo adunay conference meeting tali sa DPWH-7, CCTO ug ubang hingtungdang buhatan.

“By June, the CCTO and local officials will meet on how to go about sa opening with the project, mag-ceremonial opening ba. Before that, i-refer namo to CCTO for the traffic scheme kay naa man ta’y gi-reroute nga buses”, padayag ni dela Cruz. Sukad sa pagsugod sa konstraksiyon sa underpass niadtong Agosto 2017 tanang bus ug delivery trucks diha gipaagi sa Cebu South Coastal Road (CSCR).

Si dela Cruz nagkanayon nga desisyon unya sa CCTO kon tugotan nila o dili ang mga bus, mini bus ug delivery truck nga makaagi og balik diha sa nahisgutang dalan sa south district. Gawas sa underpass, ang access road alang sa mga sakyanan mao ang northbound ug southbound side roads. Sa kasamtangan, ang traffic system ang Public Utility Jeepneys (PUJs) ug pribadong sakyanan lang ang makaagi sa side roads.

Ang diversion routes accessible usab nila sama sa Ganciang St., Caimito St., F. Llamas St. ug uban pa.

Ang WT Construction Inc., kontraktor sa proyekto 92 porsyento na nga naka-accomplish sa underpass.

Matud usab ni dela Cruz nga ang WT Construction Inc. hapit na mahuman sa tanang involved works sa northbound lane sa underpass ug sa buwan sa Mayo ang tanang trabaho sa kontraktor adto motutok sa habig sa south.

Human sa southbound lane mopadayon sila sa pagtrabaho sa pavement nga maoy kataposang bahin sa konstraksiyon. (/BDB)(BANAT NEWS)