CEBU, Philippines – Gisaway ni incumbent Mandaue City Vice Mayor Carlo Fortuna ang resolusyon sa mga oposisyon nga sakop sa konseho diin alang kaniya ang maong resolusyon nagpakita kini nga walay pagtagad sa mga kabus.
Ang nahisgutang resolusyon nag-awhag sa Commission on Elections sa hingpit nga pagpabasura sa mga gisang-at nga petition sa pagpa-exempt sa provision sa election code sa nasud.
Ubos sa resolusyon nga giaprobahan sa oposisyon nga mga konsehal nagpasabot nga ang pagpagawas sa pundong salapi gikan sa panudlanan alang sa pinansiyal nga hinabang panahon sa campaign period masambugan og politikanhong katuyoan.
Pito ka konsehal nga sakop sa oposisyon nga naglakip sa presidente sa Association of Barangay Council (ABC) Ernie Manatad niawhag sa Comelec nga ibasura ang hangyo sa Mandaue City nga i-exempt ang pagpadayon nga paghatag sa financial assistance ngadto sa beneficiaries nga anaa sa krisis nga sitwasyon nga naglakip sa mga petsa gikan sa Marso 29 hangtud sa Mayo 12 nga maoy campaign period.
Ang mayoriyang sakop sa konseho sa dakbayan mga kaalyado ni Kongresista Jonas Cortes kinsa nagpapili sa pagkamayor sa siyudad atbang ni incumbent mayor Luigi Quisumbing nga nagpasubli sa iyang katungdanan sa ikaduhang termino.
Gisumbalik ni Fortuna ang mga sakop sa oposisyon nga maoy namolitika.
Matud ni Fortuna nga ang maong programa sa niaging tuig pa kini nilang gihimo sa pagtabang sa mga kabus nga nanginahanglan nga naglakip sa Hinabang sa Edukasyon, Livelihood ug Panglawas sa tanan (HELPS).
Dugang ni Fortuna nga higpit nilang gisubay ang nalatid nga balaod sa Comelec hinungdan nga magpadayon gihapon ang pagpanghatag sa mga financial assistance, pinaagi sa HELPS. (/BDB) (BANAT NEWS)