CEBU, Philippines — Pangulo sa Cebu Archdiocesan Commission on Worship mipahimangno sa mga tumutuo bahin sa hiwi nga tinuohan sa paggamit sa mga lukay nga gibenditahan atol sa Palm Sunday.
Si Fr. Glenn Therese Guanzon, direktor sa maong komisyon mipasabot nga ang gibenditahan nga mga lukay dili gamiton alang proteksyon sa mga kabalayan batok sa mga dautang espiritu apan aduna kini mas lawom nga espirituwal nga kahulogan.
Samtang adunay uban nga gigamit kini sa mga sugarol isip ‘hapin’ sa ilang mga manok pangtari sa pagtuong pangpabwenas kini.
"The palms are blessed and placed in our houses to welcome Jesus into our homes and not as an anting-anting or amulet to ward off evil spirits," dason niya sa Banat News.
Linahi ang selebrasyon sa Misa karong adlaw Domingo tungod kay pagasugdan kini sa pagbendisyon sa mga lukay nga pagadad-on sa mga parokyano.
Aduna usab mga baligya nga mga lukay nga maglaray gawas sa simbahan. Naandan usab sa mga tawo nga magdala niini pauli sa ilang mga balay aron isab-it kini sa bintana o sa bungbong.
"It’s called Palm Sunday because of the blessing and procession of palms to welcome Jesus into our communities, homes and lives," matud pang Guanzon.
Si Guanzon nagkanayon nga dili lang benditahan ang mga lukay aron lang kini mabendisyonan, apan gamiton usab kini sa prosesyon nga nagsimbolo sa pagsulod ni Hesus sa Jerusalem.
Ang Palm Sunday, o gitawag nga Passion Sunday, matud sa Ebanghelyo, gisugat Siya sa mga tawo nga adunay dalang lukay ug gibutang nila kini sa Iyang agianan.
Ang pagsulod ni Hesus sa Jerusalem nahitabo sa wala pa siya gidakop (sa Holy Thursday) ug sa iyang paglansang sa krus (sa Good Friday). Giisip ang Palm Sunday nga sinugdanan sa Semana Santa, o ang katapusang semana sa Kuwaresma.
"It is important for Catholics to participate with these religious activities because the faithful relives Christ's passion and death that saved us," matud ni Guanzon. (/IBM)(BANATNEWS)