Talisay Police 'full alert' sa Semana Santa

CEBU, Philippines – Full alert ang mga kapolisan sa Dakbayan sa Talisay karong panahon  sa semana santa subay sa ilang paghatag og seguridad sa katawhan.

Si Chief Insp. Ardeolito Cabagnot, deputy chief sa Talisay City Police Station niingon nga lima ka mga simbahan ang ilang butangan og police assistance desk sa mga tawo nga nanginahanglan kanila.

Samtang dili sab nila mabiyaan ang mga malls ug resorts kay ang ubang katawhan pahimuslan man ang taas nga bakasyon isip maglulinghayaw.

Laing butangan og kapulisan ang merkado nga maoy tapukanan gyud kaayo sa bagang duot sa katawhan nga mamalit sa ilang mga panginahanglanon.

Base sa intelligence monitoring nitataw si Cabagnot nga wala silay naobserbahan nga presensya sa mga dautang elemento nga posibleng manghasi nianang mga panahona.

Hinuon ang Talisay walay dagko nga kalihukan nianang  semana santa kun di mao ang mga kalihukan lang sa mga simbahan.

Siya nihangyo sa katawhan nga i-obserbar sa tanan ang adlaw sa kwarisma nga solemni ingon man sila mag- amping sa tanan nga gimbuhaton. —/LPM (BANAT NEWS)