CEBU, Philippines – Mihatag og direktiba si Cebu City Mayor Tomas Osmeña ngadto sa Cebu City Police Office nga likayan ang pagtago sa ilang identity atol sa ilang himuong operation aron malikayan ang sayop nga impresyon gikan sa publiko.
Sa memorandum nga adunay petsa nga Abril 4, 2019 nga gi-addressed kang CCPO director Police Colonel Royina Garma, ang mayor miasoy wala kinahanglana sa police operatives ang pagsul-ob og maskara sa bisan unsa nga legitimate operations.
Kay matud pa, ang pagtabon sa ilang mga nawong makahatag og bati nga impresyon sa publiko nga dili unta angayan nga mahitabo.
Gilauman nga ang CCPO motuman sa kamanduan ni Osmeña sanglit ang mayor adunay katungod nga mohatag og direktiba nila subay na sa nakalatid sa Republic Act 8551 kon “Philippine National Police Reform and Reorganization Act of 1998”. Subay niini, si Konsehal Joel Garganera, tsirman sa Police Advisory Council (PAC) misaway sa gihimo ni Osmeña.
Matud sa konsehal ang maong memo naghatag og wrong signal sa publiko.
Subay niini, gibarogan ni Philippine National Police General Oscar Albayalde nga importante nga magtaptap sa ilang nawong ang mga operatibang polis aron matago ang ilang mga identity panahon sa operasyon, ilabi na ang mga intelligence operatives ug mga asset.
“We’re dealing with syndicates here. Kawawa naman sila kung ma-exposed (ang) mga identities nila,” sigon ni Albayalde.
“’Yong intelligence officers, we also have to protect their identities, otherwise wala na, compromise na ‘yong safety nila. Remember these are assigned in a certain place. So, everytime makita sila wala na tayong makuha,” dugang sa heneral.
Giklaro hinuon ni Albayalde nga dili sa tanang panahon magsul-ob og maskara ang mga polis kay magdepende kini sa gibug-aton sa kaso.
Dili usab kinahanglang mag-mask ang mga mosilbi og search warrant sanglit katungod sa akusado nga mahibaw-an kon kinsa ang mga nanghiling sa iyang lugar ug midakop kaniya.
Wala hinuon misupak si Albayalde sa mando ni Mayor Osmeña. Iyang gipadayag nga girespeto nila ang katungod sa mayor apan barugan gihapon nila ang pagprotektar sa mga operatiba ilabi na kontra drogas.
Si Albayalde naabot sa Sugbo kagahapon alang sa meeting kabahin sa pagpangandam sa umaabot nga piniliay. (Camille L. Pateres/DILT)(BANAT NEWS)