CEBU, Philippines – Nagtingkagol diha sa detention cell sa Liloan Police Station ang 46-anyos nga ginang ug ang 52-anyos nga giingong kabit niini human sila naaktohi sa bana sa babaye diha sa sulod sa usa ka lodge sa Lungsod sa Liloan nga naghilawas niadtong Martes sa gabii.
Gipugngan sa Banat News ang mga pangalan sa duha kinsa parehong sales agent sa dakbayan sa Mandaue. Ang hepe sa Liloan Police Station Police Major Danilo Colipano nibutyag nga nagpatabang sa ilang estasyonan ang habal-habal drayber nga bana sa 46-anyos aron dakpon ang duha nga nag-check-in sa usa ka lodge.
Giingong naakto-hang naghilawas ang duha hinungdan nga gisikop kini ug gitanggong sa kapolisan sa maong lungsod.
Matud ni Colipano nga gikan sa ilaha sa Dakbayan sa Mandaue gisundan sa bana ang iyang asawa sakay sa sakyanan sa kabit niini.
Nanghunong ang duha ug ni-check in sa usa ka lodge sa Liloan.
“Dugay na kuno nagduda ni ang bana nga naay kabit iyang asawa maong iyang gisundan”, butyag ni Colipano.
Ang bana giingong desidido kining mopasaka og kaso batok sa iyang asawa ug sa kabit niini. (/BDB)(BANAT NEWS)