Mga pari mobag-o sa ilang panaad
CEBU, Philippines — Ang kaparian sa Archdiocese of Cebu mohimo na usab sa pagbag-o sa ilang panaad atol sa Chrism Mass nga ipahigayon karong adlaw’ng Huwebes.
Gatusan ka pari, diocesan ug religious nga sakop sa archdiocese ang subling manaad sa ilang pagpangalagad sa simbahan sa alas 9:00 sa buntag sa adlaw nga Huwebes diha sulod sa Cebu Metropolitan Cathedral.
Si Archbishop Jose Palma maoy mangulo sa ipahigayon nga chrism mass.
Sa dili pa ang chrism mass nga ipahigayon sa adlaw nga Huwebes, usa ka recollection sa kaparian ang ipahigayon sa adlaw nga Miyerkules nga sugdan sa ala 1:00 sa hapon pinaagi sa holy hour ug uban pa nga mga kalihukan ang mosunod.
Atol sa chrism mass panalanginan ni Palma ang mga bag-ong lana nga gamiton alang sa konpirma, bunyag, ordinasyon ug hilog.
Atol sa chrism mass makahimo usab pagsalmot ang mga layko pinaagi sa pagtambong sa maong kalihukan.
Mahinumduman sa karaan nga panahon, sayo sa buntag sa Huwebes Santo ang chrism mass apan tungod kay adunay mga kura ang motabok pa ug mga kaislahan alang sa mga kalihukan nga pagahimuon sa ilang tagsa-tagsa ka mga parokya hinungdan mas gipasayon ang maong aktibidades sa simbahan. (/BDB)(BANATNEWS)
- Latest
