Sikyu nga nipatay sa dalagita gipangita

CEBU, Philippines — Padayon ang hot pursuit operation batok sa gwardiya sa Cogon Cruz Integrated School sa Dakbayan sa Danao nga maoy suspek sa pagpatay sa 14-anyos nga dalagita nga iyang uyab kansang lawas naugkat gikan sa septic tank sa maong tunghaan.

Ang gipangita mao si Jessi Medequillo, 34, kinsa giingong uyab sa biktima. Matud pa ni Lieutenant Colonel Maribel Getigan, hepe Danao City Police Station posibleng nagkabikil ang duha.

Sumala pa ni Getigan, nakadawat sila ug mga information nga si Medequillo maoy nagsuporta sa panginahanglanon sa biktima nga si Thesa Marie Ygay human ang mga ginikanan niini ang nagbuwag ug sa iyaan na kini nagpuyo sa Barangay Ibo sa Dakbayan sa Lapu-Lapu.

Dugang pa ni Getigan masuko ang suspek kun molaag ang biktima nga dili mananghid kaniya.

Niadtong Marso 25, nisumbong ang dalagita sa polis ug nagpa-blotter kay giupawan ni Medequillo. Si Medequillo maoy gitumbok sa mga saksi nga maoy katapusang kauban sa biktima sa dihang wala pa kini nawala.

Kagahapon sa buntag gipaubos sa autopsy ang patay nga lawas ni Ygay nga gihimo ni Dr. Benjamin Lara, medico legal officer sa PNP Crime Laboratory. (Mae Clydyl Availa/IBM)(BANATNEWS)