Mga politiko sa Talisay igo lang maglabayay og isyu–Conag
CEBU, Philippines — Ang hepe sa kapolisan sa Dakbayan sa Talisay Superintendent Marlu Conag nipadayag nga wala ray problema ang siyudad kalabot sa umaabot nga piniliay karong umaabot buwan sa Mayo.
Gibutyag ni Conag nga nagsugod na sa paglinabayay og mga isyu ang mga politiko apan nagtuo siya nga diha lang kini kutob.
Sa niaging adlaw ang kapolisan sa siyudad nipahigayon og “Oplan Katok” ngadto sa opisyales kinsa ang mga armas na-expire na ang lisensiya.
Matud ni Conag nga dali usab nga nituman ang mga opisyal diin bulontaryo kining nisumitir sa ilang armas.
Si Conag nagkanayon nga ilahang gituyo ang maong kalihukan paglikay sa posibleng mahitabo niining panahon sa eleksiyon.
Gipasabot ni Conag nga ang mga armas mamahimo kining gamiton sa pagbuhat og krimen.
Hinuon ang Siyudad sa Talisay anaa kini sa green category o lakip sa mga lugar nga dili delikado sa piniliay base usab sa niaging piniliay nga nanglabay. (/BDB)(BANATNEWS)
- Latest
