CEBU, Philippines — Sa pagsugod na sa pagpangampanya sa mga kandidato sa ika-unom nga distrito sa Lalawigan sa Sugbo, nabati sa mga lumulupyo nga maoy mopili kanila ang nagkadaiyang panaad nga giingong makahatag og kaayohan ngadto kanila.
Sama ni Dr. Paulus Cañete kinsa buot magpapili pagka board member, misaad sa paghatag og prayoridad sa mga kabus nga kabataan nga makapadayon sa ilang pagtungha hangtod na nga makasulod sila og trabaho.
Dugang niini nga iyang paningkamutan nga ang ika-unom nga distrito, makabaton na og probinsiyal nga tambalanan nga naglakip sa Lungsod sa Consolacion ug Cordova.
Si Mayor Liugi Quisumbing kinsa magpasubli sa iyang ikaduhang termino isip mayor sa Dakbayan sa Mandaue, misaad sa pagpadayon sa nasugdan niyang proyekto ug mga programa uban ang pagsiguro nga dili mausik ang kuwarta sa gobyerno.
Si Sixth District Representative Jonas Cortes nga maoy higpit nga kaatbang karon ni Mayor Quisumbing, atol sa opening salvo sa ilang rally, misaad usab ngadto sa mga Mandauehanon nga sa iyang pagbalik isip mayor sa dakbayan, iyang himuon ang pagwagtang sa ordinansa nga nagdili sa mga motorista nga magtabon sa ilang nawong.
Ang taga Consolacion nga si Ricardo Ytang mipaabot ngadto mga kandidato nga hatagan unta og kasulbaran ang kalisdanan sa mga nanarbaho ug nagtungha sa Dakbayan sa Sugbo kinsa naglisod og sakay matag adlaw. Gitataw niini nga daghang taga Consolacion ug Mandaue nga nagsalig og sakyanan nga pasaheroan hinungdan nga sila naglisod sa ilang pagsakay hinungdan nga sila malangan sa pagtambong sa trabaho o tunghaan ug mangapasmo sa ilang pagpamauli inig ka gabii. (/DILT)(BANATNEWS)