CEBU, Philippines – Sila si gubernatorial candidate Gwen Garcia ug bokal Alex Binghay misang-at og kaso batok nila ni Gobernador Hilario Davide III, Bise Gobernador Agnes Magpale ug ubang opisyal sa Kapitolyo kalabot sa pagpatukod sa 20-storey resource center o ang “Torre ni Davide”.
Ang civil case nga adunay injunction gi-file kini sa RTC Toledo sa kampo ni Garcia niadtong Marso 26. Apil nga gikiha mao sila si Provincial Administrator ug BAC chairman Mark Tolentino, WT Construction Inc., ang kontraktor sa edipisyo ug Development Bank of the Philippines, ang bangko nga giutangan sa Kapitolyo alang sa pagpatukod sa maong resource center.
Dili momenus walo ka grounds ang gitumbok ni Garcia kon nganong angay hunongon ang katukuran sa maong edipisyo sulod sa Capitol compound. Naglakip niini nga walay authority si Davide nga mopirma ug execute sa Deed of Assignment with Hold-out kay walay pagtugot sa Sangguniang Panlalawigan ug ang execution sa contract niini kalapasan sa Sec. 22 sa RA 76120. Sumala ni Garcia ang bidding, ang pag-award ug ang kontrata sa maong proyekto ilegal tungod sa kakuwang sa pundo.
Dugang pa niini mao nga gipadayon gihapon ang maong proyekto bisan og walay pagtugot sa National Historical Commission of the Philippines ug National Cultural Heritage Act of 2009. Si Garcia nagkanayon nga mipasaka sila sa kaso tungod sa kabalaka sa mga tawo sa lalawigan kay ang maong proyekto matud pa, dili makabenepisyo ang mga Sugbuanon.
Si Davide miingon nga adunay katungod si Garcia nga mopasaka og kaso ug magpaabot ra siya nga manduan sa korte nga motubag sa tanang pasangil. Gitataw niini nga wala silay plano nga undangon ang maong proyekto ug iyang gihulagway nga desperado si Garcia ug pamolitika lang gihimo niini kay giatol ang pagpasaka og kaso karon nga magsugod na ang kampanya. (/DILT)(BANAT NEWS)