Sanitary landfill sa Carmen ipaagi og PPP

CEBU, Philippines – Target karon sa kagamhanan sa Lalawigan sa Sugbo nga malabayan na ang sanitary landfill nga nahimutang sa Brgy. Dawis Sur sa Lungsod sa Carmen sunod tuig.

Ang 18 ka  ektarya nga luna nga gipanag-iya sa Kapitolyo maoy tukoran unya sa maong proyekto nga gipaubos sa public-private partnership (PPP).

Matud ni Rodel Bontuyan ang pangulo sa Provincial Environment and Natural Resources Office (PENRO) nga ang maong landfill, gamiton sa kalungsuran ug dakbayan ubos sa kwatro ug kinto distrito sa amihanan diin aduna kini tipping fee nga P700 matag tonelada sa basura ang kolektahon.

Sa inisyal nga kasabutan alang sa maong landfill, ang kita gikan sa tipping fee,  bahinon kini sa Kapitolyo ug sa private proponent nga Basic Environmental System Technology (BEST) diin 25% ang sa probinsiya samtang ang 75% usab sa operator sa landfill.

Kini midugang nga walay magasto ang Kapitolyo sa pag-develop mismo sa lugar gawas lang sa agianan nga 1.3 ka kilometro nga gigahinan sa Kapitolyo og P10 milyones alang sa pagpalapad ug pag –ayo sa dalan nga agian sa dump trucks nga mohakot sa mga basura paingon sa landfill.

Giingong gipasalig sa BEST nga matrabaho o maandam niini ang maong pasilidad gikan sa unom ngadto sa usa ka tuig, hinungdan nga posibleng sunod tuig na hingpit nga masugdan ang paglabay og basura. Sa pagkakaron, ang  resolusyon sa PPP committee sa Kapitolyo napirmahan na ni Gobernador Hilario Davide III ug gani nasumiter na kini ngadto sa Sangguniang Panlalawigan, sumala ni Bontuyan.

Ang maong resolusyon mao ang paghatag og pagtugot sa gobernador nga mosulod og joint venture agreement tali sa private proponent sa landfill.

Matud niya, basi sa Waste Analysis and Characterization Study (WACS) niadtong 2017, moabot ngadto sa 1.2 milyones ka kilo sa basura matag adlaw ang makuha sa tibuok lalawigan. (/DILT)(BANAT NEWS)