CEBU, Philippines – Karong Marso 29 magsugod na sa subsob nga kampanya ang mga lokal nga kandidato ngadto botante sa pangindahay nga mahatagan og mandato nga makaserbisyo kanila. Dinhi sa Dakbayan sa Sugbu ang ang Bando Osmeña Pundok Kauswagan ug kaatbang nga Barug-PDP Laban moarangkada pinaagi sa nagkadaiyang tambongang Santos nga Misa.
Sa adlaw nga Sabado, ang BOPK nga kasamtangang administrasyon sa siyudad pinangulohan ni Mayor Tomas Osmeña maghimo og proclamation rally .
Si Konsehal Sisinio Andales, usa sa mga miyembro sa BOPK mibutyag sa Banat News nga magsugod sa alas-3 sa hapon ang proclamation rally nga pagahimoon diha sa Cebu City Sports Center (CCSC). Siya miingon nga ang tibuok kandidato ubos sa partido ipaila-ila ngadto sa katawhan. Ubos sa BOPK, ang mayoralty candidate nga si incumbent Mayor Osmeña ug si Konsehal Mary Ann de los Santos alang sa bise mayor nga posisyon.
Ang mga kandidato alang sa pagka konsehal sa siyudad sila si are Andales, Nestor Archival, Alvin Arcilla, Alvin Dizon, Jerry Guardo, Joy Augustus Young, Lea Japson, Marlo Maamo, David Tumulak, Raul Alcoseba, Eugenio Gabuya Jr., Roberto Cabarrubias, Michael Gacasan, Kirk Bryan Repollo, Marie Velle Abella, ug Rengelle Pelayo. Samtang ang mga kandidato sa BOPK alang House of Representatives mao silang South District Representative Rodrigo Abellanosa ug North District Representative Raul Del Mar.
Si Andales miingon nga kun aduna’y mga senatorial candidates nga motambong sa maong kalihokan aduna’y prebelihiyong mapaila-ila ang ilahang kaugalingon sa katawhan.
“Ipang-introduce ang mga kandidato sa publiko. Ug kung duna’y senador pwede sad ipaila-ila sad sa katawhan,” suma pa niya. Wala hinuon siya masayod kun duna bay giimbitar nga mga kandidato pagka-senador ang BOPK karong Sabado.
Karong adlawng Biyernes, ang BOPK aduna’y ipahigayon nga misa nga sa Guadalupe Church, Barangay Guadalupe, Dakbayan sa Sugbo alas 10 sa buntag.
Ang tanang kandidato sa BOPK anaa usab. Si Andales miingon nga 7, 000 ngadto sa 10, 000 nga mga higala ug supporters ang gipaabot nga motambong.
Human sa misa, ang BOPK aduna’y meeting uban sa mga barangay. Bisan pa niana, siya wala masayod kung unsa’y pagahisgutan.
Barug-PDP Laban
Samtang ang Partido-Barug PDP Laban nga gipangulohan ni Bise Mayor Edgardo Labella, ang standard bearer sa grupo mosugod sa ilang kalihokan pinaagi sa Santos nga Misa nga ipahigayon sa Cebu Metropolitan Cathedral sa sayo sa buntag.
Usa sa mga kandidato sa pagka-konsehal nga si Erik Miguel Espina miingon nga sila nakahukom sa pagsugod sa campaign period sa usa ka misa aron magiyahan sa ilang panaw isip lokal nga mga kandidato.
“The reason why we want to start the campaign season with a mass is because we want guidance and blessings from the Supreme Giver of all authority as the Bible states. And then, we will be good stewards and public servants of the people if and when we are successful in our endeavors,” saysay pa niya sa Banat News kagahapon. Human sa misa, aduna’y hand shaking ngadto sa publiko sa mga kandidato. Gibutyag hinuon ni Espina nga wala sila nakahukom kanus-a ang ilang campaign rally buhaton. “Ang katong taga north (candidates), will be north side but close to the area. Ang taga south, will be south side pud but close to the area, within the vicinity ra. Ini’g ka gabii ana the usual pulong-pulong namo,” suma pa niya.
Gawas kang Labella, ang mga kandidato sa Partido-Barug PDP Laban mao sila si kanhi mayor Michael Rama pagka bise mayor; mga kandidato sa pagka-konsehal nga silang Mabolo Barangay Kapitan Niña Mabatid, Rey Lauron, Ernest Herrera, Noel Wenceslao, Ramil Ayuman, Joel Garganera, Pastor Alcover Jr., ug Raymond Garcia sa North District.
Ang uban mao silang Espina, Donaldo Hontiveros, Phillip Zafra, Francis Esparis, Gerry Carillo, nga si Renato Osmeña Jr., Eduardo Rama Jr., ug Antonio Cuenco sa South District.
Samtang ang ilang mga kandidato pagka-kongresista mao si konsehal Jocelyn Pesquera sa South District ug ang Cebuano actor nga si Richard Yap sa North District.
Comelec
Subay niini, si Comelec Election Officer Atty. Michael Sarno miingon atol sa ilang meeting tali sa ubang ahensiya sa gobiyerno natuki ang mga anga buhaton sa umaabot nga piniliay. Apil na niini ang nagkadaiyang implimentasyon sa mga Comelec resolutions alang sa pagsiguro sa kalinaw ug hapsay nga piniliay.
“Gipahibalo namo unsay violation come Election day. Nangutana sila unsay buhaton, clarification such as ban sa infrastructure, sa atoang security sad unsa ilang directive,” matud pang Sarno.
Apil sa gituki ang seguridad unya sa mga ipanghatud nga mga balota ug uban pang gamitonon sa piniliay pinaagi sa opisyal nga courier nga mao ang LBC.
Lakip sa gipangandaman og hugot nga seguridad ang mga PCOS machines ug ang hustong pagdala ug paggamit niini ingon man ang gidaghanon sa mga mobantay ug kun asa kini ipahiluna atol sa piniliay. (Decemay P. Padilla/IBM)(BANAT NEWS)