Motorista nabahin sa Rep. Act 11235

CEBU, Philippines – Nabahin karon ang mga motorista sa gipadayag nga mga reaksiyon labot sa bag-ong balaud nga ipatuman sa nasudnong kagamhanan nga ubos sa Republic Act  11235  o gitawag og Motorcycle Crime Prevention Act  2019.

Naglakip sa mipadayag sa ilang reaksiyon labot niini ang mga sakop sa kahugpongan sa mga habal-habal drayber  nga sakop sa Eskina Canduman Association (ECA) nga naglakip nila ni  Felix Norbuada ug Carlos Layam nga pulos nagbiyahe sa ilang habal-habal sa maong lugar.

Si Norbuada  sa iyang reaksiyon miingon nga  gigamit ang motorsiklo nga sakyanan  sa mga dautang pundok sa katilingban ug naangin lamang ang kadaghanan nga naggamit sa maong sakyanan alang sa kaayohan.

Gitataw niya nga  nagduha-duha nga mao ba gayod ang makasulbad sa maong suliran nga naglambigit sa mga motorsiklo ang pagbutang og plate number sa atubangan ug pangunahan  tungod kay mahimo man kining tangtangon ug ilisan og lain nga plate number.

Samtang si Layam sa iyang reaksiyon ang mipadayag og pagsaway sa maong lakang kay dagko na ang ibutang nga plate number nga maklaro kini sa 15 metros nga gilay-on.

Si Layam miingon nga kuyaw  nga ang  dagkong plate number maoy hinungdan sa mahitabong aksidente kay masabod man kini sa paglusot sa gagmay nga  agianan sa panahon nga naghuot ang mga sakyanan tungod sa masinati nga grabeng traffic sa dalan.

Dugang nga mipadayag sa iyang reaksiyon mao si Teofisto Saludar  nga maoy presidente sa Catarman Habal-Habal Driver Association kinsa miingon nga dili ang pagbutang og dagkong plate number sa mga motorsiklo ang pagsulbad sa krimen kon dili ang pagpalig-on sa police visibility ug ang pagbutang og mga CCTV camera sa kadalanan maoy labing gikinahanglan.

Samtang si Aldin  Ybañez nga taga Dakbayan sa Lapu-Lapu sa iyang reaksiyon  daw gibato og katahap sa pagpatuman sa maong balaod tungod kay sa kasamtangan ang LTO nga nagpatuman sa tagsa lamang ka plate naglisod pa sa pagluwat niini ngadto sa mga motorista.

Si Dr. Freddie  Agusto Inot sa Barangay Mactan sa Dakbayan sa  Lapu-Lapu ang kusganon nga mipadayag sa iyang pagsupak uban ang pagpasabot nga makahatag kini‘ og kahasol sa mga motorista nga lagpad ba kaayo ang atubangan ug luyo nga plate number niini.

Sa nasayran nga ubos sa maong balaod gihulagway  kini nga “secure and safeguard its citizenry from crimes committed with the use of motorcycles through bigger, readable and color-coded number plates and identification marks.” (BANAT NEWS)