Supply sa tubig sa Sugbo nikunhod na

CEBU, Philippines — Gihangyo ni Konsehal David Tumulak tanang residente sa Siyudad sa Sugbo nga motabang sa pagdaginot sa tubig tungod sa pagkunhod sa supply niini.

Kagahapon sa buntag gitigom ni Tumulak ang representante sa Metropolitan Cebu Water District (MCWD) ug Mactan Rock Industries, Inc. (MRII) aron masolusyonan ang kakuwang sa tubig.

Giingong niabot na sa 10,000 cubic meters ngadto sa 20,000 cubic meters kada adlaw ang ka kuwang sa supply sa tubig sa siyudad.

Adunay mga barangay nga walay tubig gikan sa alas 6:00 sa buntag hangtud sa alas 2:00 sa kadlawon sa sunod adlaw sama sa Sambag 1, Sambag 2 ug Cogon Ramos samtang ang Barangay Capitol Site wala usab kini tubig gikan sa alas 7:00 sa buntag ngadto sa alas 6:00 sa gabii.

Ang problema sa kakuwang sa tubig epekto sa weak El Niño nga nasinati sa nasud  karon.

Ug tungod niini, gihangyo ni Tumulak ang tanang residente ug mga carwash company nga  dili mag-usik-usik og tubig.

Matud ni Tumulak nga dunay MRII ug Pilipinas Water Resource Inc. ang makatabang sa problema sa kakuwang sa tubig sa syudad.

“Ang Mactan Rock (MRII) nagkasinabot ug ang MCWD nga motabang sila og supply og tubig diri sa atong dakbayan. Mohatag usab sila og tubig alang sa atong fire truck in case og dunay sunog ug mga tubig para pang bisbis sa mga tanom sa parks and playground”, padayag ni Tumulak.

Sa laing bahin, ang mga fire truck mamahimong manguha og tubig gikan sa hydrants sa MCWD diha sa  Labangon, V. Rama, N. Bacalso, Doña Rita Subdivision sa Banilad, Mabolo, Barangay Hall sa Lahug, Mormons Church sa Lahug gihapon ug sa Juan Luna Avenue. (BANAT NEWS)