Mga Barangay Police sa Talisay nagmika?

CEBU, Philippines — Nipadayag sa ilang kasagmuyo ang pipila ka mga kapitan sa Dakbayan sa Talisay labot sa mga polis nga gidestino diha sa ilang barangay.

Ang kapitan sa Barangay Campo 4 nipahibawo nga matag kontak niya sa Police sa Barangay (PSB) aduna kini rason nganong dili makatunga o makatubag sa ilang hangyo. Susama usab niini ang reklamo sa ubang mga barangay kapitan.

Samtang si Kapitan Osmundo Manreal sa Barangay Pooc nagpasalamat nga nakahigayon sila og estorya sa ilang habig sa pakigbatok sa ilegal nga drugas.

Siya nipadayag nga dili lalim para kanila tungod kay sila maoy daling makit-an sa mga ilegalista. Iyang gihangyo nga unta matagaan sila og armas aron sila makapanalipod sa ilang kaugalingon.

Samtang si Kapitan Joselito Laurente sa Barangay Manipis nipakasusama sa ilang sitwasyon sa bibingka nga nakapabalaka sa ipang seguridad.

Sa iyang bahin, si Supt. Marlu Conag, hepe sa kapulisan sa Dakbayan sa Talisay nipahibawo nga andam siya nga modawat sa reklamo sa mga opisyales labot sa iyang mga sakop nga nagmika sa ilang trabaho.

Apan iyang gipasabot nga dili siya makasiguro sa hangyo nga armas sa mga kapitan.

Apan matud niya mahimo silang makabaton og armas basta motuman lang gyud sila sa mga rekisitos.

Niadtong adlaw nga Biyernes, nitambong ang direktor sa Cebu Provincial Police Office (CPPO) sa gipahigayong tigom sa City Anti-Drug Abuse Council (CADAC) sa Talisay. Mao kadto ang labing unang higayon nga gisanong ang ilang imbitasyon.

Si Sr. Supt. Manuel Abrugena nagkanayon nga tuyo gyud niya nga makigkita sa mga opisyales sa Talisay aron mapahinumduman ang tanan nga ang kampanya batok sa ginadiling drugas dili nila mahimo nga sila lang sa mga polis kay kinahanglan ang partisipasyon sa tanang katawhan.

Usa sab sa iyang tumong mao ang pagwagtang sa kabalaka sa mga taga Talisay tungod sa pamahayag ni Presidente Rodrigo Duterte nga ang Talisay maoy pinakadaghan og ilegal nga drugas dinhi sa Sugbu.

“I admit this is a big challenge and mixed emotion ako ngayon. We have to do even more on anti-illegal drugs,” nagkanayon si Abrugena.

Si Mayor Eduardo Gullas niangkon nga nasakitan gyud siya nga ang Talisay maoy ra ang natutokan kaayo labot sa ilegal nga drugas.

Matud pa niya nga mas maayo pa gani ang Talisay itandi sa ubang mga lugar sama sa Cebu City, Mandaue ug Lapu-Lapu City. “Nasakitan gyud ko kay ang Talisay mura’g lapok nga gitunob-tunoban,” asoy pa niya.

Hinuon iyang giklaro nga hugot ang iyang suporta sa kapulisan. Gani andam sab siya nga mohatag sa gipangayo nilang mga gamit aron mapahugtan pa ang ilang operasyon.

Gitambungan ang maong kalihukan sa mga kapitan, ubang departamento ug ni Kongresista Gerald Anthony “Samsam” Gullas. (/IBM)(BANATNEWS)