Ipadeklara og sayo ang dengue outbreak

CEBU, Philippines – Buot nga ipadeklarar sa Provincial Health Office (PHO) nga ipaubos sa dengue outbreak ang tibuok Lalawigan sa Sugbo.

Si Dr. Rene Catan ang pangulo sa PHO mirekomendar ngadto kang Gobernador Hilario Davide III ug sa Sangguniang Panlalawigan gumikan sa nagpadayong pagsaka sa kaso sa dengue sa lalawigan.

Basi sa datus sa maong buhatan, moabot na ngadto sa 1,213 ang kaso sa dengue sa bulan sa Enero karong tuiga diin grabe ang pagsaka niini kon itandi sa 232 sa miaging tuig sa susamang period.

Sa bulan sa Pebrero, 886 na ang kaso kon itandi sa parehong bulan niadtong 2018 nga niabot sa 207.

Niadtong miaging tuig, miabot sa 5, 363 ang kaso sa dengue sa tibuok lalawigan diin 26 ang namatay.

Karong tuiga matud ni Catan nga siyam na ang patay sa bulan sa Enero hangtod Pebrero. Natala kini sa mga dakbayan sa Bogo, Toledo ug sa mga lungsod sa Santa Fe, Tuburan, Pinamungajan, San Remigio, Daanbantayan, Balamban ug Bantayan.

Dugang ni Catan nga mas maayo nga sayo pa lang madeklarar na nga outbreak aron mapahingusgan ang kampanya batok niini pinaagi usab sa halapad nga information drive ug awareness hilabina sa mga tunghaan.

Ang Kapitolyo nagplano nga makig-alayon ngadto sa Department of Education alang niini.

“We must include dengue education through curriculum” matud ni Catan.

Midugang kini nga angay tudloan ang mga bata sa ovitrap, usa ka mekanismo nga modakop og lamok diin mahimo ra kini sa mga bata.

“Naa tay gi-design nga ovitrap, nga biyaan ra nimo diha, mangitlog ang lamok didto sa screen unya mahulog iyang  egg unya mahimo na siya og kiti-kiti, mahimo na siya nga lamok pero dili na na sya makagawas” asoy ni Catan.

Ang PHO nangandam na sa dengue outbreak sanglit basi sa ilang obserbasyon, adunay “cyclical pattern” o trend nga matag tulo ka tuig mosaka ang kaso sa dengue.

Gibasehan nila ang nahitabo sukad sa tuig 2013 ngadto sa tuig 2016 ug karon gipaabot nga mosaka kini sa tuig 2019, hinungdan nga giawhag niya ang publiko nga motabang sa gobyerno pagbatok sa dengue. (/DILT)(BANAT NEWS)