Ahensiya sa gobiyerno kuwang og ekipo sa komunikasyon

CEBU, Philippines – Kakuwang sa komunikasyon sa tibuok ahensiya sa gobiyerno nga ang tahas mao ang pagresponde sa mga katalagman maoy nadiskubrehang babag sa paspas nga pagresponde.

Kagahapon nagpahigayon og Bomb Simulation Exercise (SIMEX) sa parking area sa Cebu Metropolitan Cathedral ang Police Regional Office-7 inabagan sa Armed Forces of the Philippines-Task force Cebu. Anaa sab ang Bureau of Fire Protection (BFP)-7, Emergency, ug ang City Disaster Risk Reduction Management Office. Si PSupt. Lorenzo Batuan, Deputy City Director sa Cebu City Police Office, kinsa maoy nangulo sa maong kalihukan nagkanayon nga kinahanglang adunay radio communication nga centralized alang sa mga ahensiya sa gobyerno.

“Lami gyud unta kung naay communication system nga centralize nga konektar ang tanang agencies,” sigon ni Batuan.

Iyang gipasabot nga ang polis kinsa maoy first responder mao sab ang manawag sa ubang ahensiya nga kinahanglanon depende sa insidente. Gipadayag ni Batuan nga ila kining gihimo isip pagpangandam kon adunay pagpamomba nga mahitabo sa Sugbo.

Nasayran nga niadtong Enero 27, gibombahan ang Cathedral of Our Lady of Mount Carmel didto sa Jolo, Sulu diin miabot sa 18 ang nakalas. Hinuon, miingon si Batuan nga wala pa silay namonitor nga hulga sa seguridad sa Dakbayan sa Sugbo.

“So far, murag wala man pud layo lang ta diri sa Cebu, malinawon ra ta diri but then again kinahanglan nga atong i-rehearse,” dugang niini.

Sa SIMEX kagahapon, ang sitwasyon mao nga adunay mibuto nga improvised explosive device sa kilid sa parking lot sa maong simbahan. Sa dihang mibuto, dali nga gialihan sa kapolisan ang palibot sa simbahan ug gipangutana sa mga miresponde pinaagi sa megaphone kun aduna bay makalakaw sa mga nanga-angol nga biktima. Sa paggawas sa mga biktima, miuna og sulod sa nahitaboan ang naka-bomb suit nga sakop sa  Explosive Ordnance Division (EOD) samtang ang bomb sniffing dogs gipa-roving sa lugar aron masuta kon aduna pa bay mga nahabiling bomba.

Human nasuta nga wala na, didto na misulod ang emergency responders ug ang Scene of the Crime Operatives aron pagtala ug pagpanguha og mga ebidensya sa lugar. (/DILT)  (BANAT NEWS)