Sunog niulbo sa Kapitolyo
CEBU, Philippines — Nahunong sa trabaho ang mga empleyado sa legislative building sa Kapitolyo tungod sa nahitabong short circuit sulod sa buhatan ni bokal Earl Tidy Oyas kagahapon. Matud ni SFO3 Emeliano Daño ang fire investigator sa Cebu City Fire Station- Guadalupe Substation nga adunay “loose contact” sa saksakanan ug outlet.
“Ang hinungdan, lose contact ang iyahang plug ug outlet, mao ‘toy naka- create og spark. According sa staff didto, ang gi-suplayan atong gikan sa outlet naa siya’y gituslok nga extension cord padulong didto sa ilahang water dispenser,” dugang ni Daño. Si Engr. Martin Soc Alfafara Jr. sa provincial engineering’s office nagkanayon nga base usab sa ilang pakisusi, adunay short circuit nga nahitabo.
Wala ra hinoon modako ang sunog kay dali kining napawong pinaagi sa fire extinguisher sa kapitolyo, apan temporaryo usa gipawong ang breaker sa third floor sa legislative building kagahapon.
Nabantayan sab sa mga bombero nga wala mogana ang control panel sa building. “Wala na mag function ang ilang panel board. Mao na siyay mo-notify nga ana nga room naay alarma,” matud ni Daño. Niadtong niaging tuig, ang Cebu City Fire Department nihimo og inspeksyon sa mga building sa Capitol compound ug usa sa ilang girekomendar nga kinahanglang ipaayo ilang fire detection and alarm system.
Nabantayan usab ni Daño nga sa pipila sa mga floors sama sa ika upat nga andana sa maong edipisyo dili dali maagian ang “fire exit” sanglit sa matag kilid sa maong andana, adunay lawak nga kinahanglan pa agianan, sama sa buhatan sa bise gobernador nga anaa sa wala nga bahin ug session hall sa tuo nga bahin. Nakita usab sa mga bombero nga daghang obstruction ang hallway sa pipila ka floors tungod kay adunay gibutang nga mga gamit ug makaali sa mga tawo kun may emerhensiya.
Si Ainjeliz dela Torre-Orong ang provincial information officer nagkanayon nga, “compliant” ang Kapitolyo sa gi-require sa BFP sama sa fire extinguisher ug fire exits.
Ugmang adlawa, gikatakda nga mohimo sa annual nga inspeksyon ang kabomberohan sa Capitol compound. (BANAT NEWS)
- Latest
