Mga polis giawhag nga dili moapil sa politika

CEBU, Philippines — Giawhag ni Gobernador Hilario Davide, III ang mga polis sa Probinsiya sa Sugbo nga molikay nga maimpluwensiyahan ug magpagamit sa mga politiko karong umaabot nga piniliay.

Atol sa pag-apod-apod sa cash incentives sa Kapitolyo ngadto sa 135 ka hepe ug police personnel sa nagkadaiyang police station ug unit sa PNP  kagahapon si Davide nagkanayon nga kinahanglang magpabilin lang sa ilang trabaho ang mga polis ug dili mag-apil-apil sa kampaniya sa eleksiyon.

Si Police Senior Superintendent Manuel Abrugena, direktor sa Cebu Provincial Police Office (CPPO) nagkanayon nga wala pa silay nadawat nga taho nga adunay mga polis nga nag-apil-apil sa politika.

Matud ni Abrugena nga ang mga polis nga madestino sa mga campaign sorties walay kalapasan nga mahimo niini sanglit ang publiko man ang gibantayan ug dili ang politiko.

Si Abrugena apil kini sa nitambong sa seremonya kagahapon pag-apod-apod og cash incentives sa police personnel nga nagmalampuson sa mga operasyon niini pagbatok sa ilegal nga drugas.

Sa iyang mensahe, nagkanayon kini nga ang paghatag og incentives sa mga  polis makapa “boost sa morale” ug makaengganyo kanila nga magkugi pa sa pagbatok sa ilegal nga drugas.

Ang incentives nga nadawat sa kapolisan P1, 000 pataas depende kini sa kadako sa nahimong operasyon ug pila ka gramo sa ilegal nga drugas ang nakuha.

Sa iyang bahin, si Carmen Remedios Durano-Meca,  pangulo sa Cebu Provincial Anti-drug Abuse Office (CPADAO) nagkanayon nga pag-abot sa demand reduction nakita nila ang gihimo sa kapolisan nga mapukan kini pinaagi sa ilang operasyon.

Apan giangkon ni Meca nga dako pa ang kulang o trabahuon sa pagbatok sa ilegal nga drugas.

Usa sa mga concern ni Meca mao ang supply reduction ug drug trafficking diin iyang gikwestiyon nganong padayon ang pagsulod sa ilegal nga drugas sa Probinsiya sa Sugbo. (BANAT NEWS)