Pari nga gipasanginlang nanglugos wala na igkita

CEBU, Philippines — Duha ka mga ahensya motutok sa imbestigasyon sa pagpanglugos sa usa ka pari sa sakristang babaye didto sa Dumanjug.

Sigun sa hepe sa Dumanjug Police Station nga si Police Senior Inspector Clemente Ceralde Jr., wala na sa maong lungsod ang pari sanglit sa dihang mibuto ang isyu gipahulipan dayon kini.

Matud ni Ceralde ang pari mao si Rev. Father Expedito Torrevillas II. Kun anaa pa gihapon kini,  di gihapon nila madakop sanglit milapas na  kini sa reglementary period kay Marso 3 pa nahitabo ang krimen ug nilabay pa ang lima ka adlaw ayha gisumbong kanila.  Butyag ni Ceralde nga ang National Bureau of Investigation-7 na ang mokupot sa imbestigasyon sa maong kaso. Ang direktor sa NBI-7 nga si Attorney Dominador Cimafranca miangkon sa Banat News nga sa pagkakaron wala pa sab sila masayod kun asa na ang maong pari apan naghimo na sila og imbestigasyon. Ang Provincial Women’s Commission (PWC) mipadayag nga mohimo sab sila og kaugalingong imbestigasyon.

Si Bise Gobernador Agnes Magpale kinsa maoy chairman sa PWC miingon nga wala pa moduol sa iyang buhatan ang pamilya sa biktima. (BANAT NEWS)