CEBU, Philippines — Gikasagmuyo ni Gobernador Hilario Davide, III ug Bise Gobernador Agnes Magpale ang pagbalhin ni Badian Mayor Carmencita Lumain ngadto sa One Cebu Party.
Si Lumain nilansar kini pagbalik pagkamayor sa Badian ubos sa Nationalist People’s Coalition (NPC) ang partido nga kaalyado nila ni Magpale sa umaabot nga eleksiyon.
Apan si Lumain, kalit lang kini nga nibalhin sa One Cebu nga partido sa kaatbang ni Magpale sa gubernatorial race sa Probinsiya sa Sugbo nga si Kongresista Gwendolyn Garcia.
Si Lumain nilansar kini nga walay kaatbang sa umaabot nga eleksiyon.
Si Magpale nagkanayon nga wala mopahibalo kaniya si Lumain sa pagtapon niini sa kampo ni Garcia.
Gilauman na usab sa kampo nila ni Magpale nga adunay pipila nga motapon sa partido sa ilang kaatbang.
Sa iyang bahin, si Davide nipadayag usab og kasagmuyo sa pagbalhin ni Lumain apan nagtuo ang gobernador nga wala kini epekto sa ilang pangampaniya.
Samtang si Magpale nagkanayon nga ang kongresista sa 7th district Peter John Calderon nag-reorganize na karon sa ilang grupo sa distrito human sa pagbalhin ni Lumain.
Ang Commission on Elections (Comelec) nitataw nga bisan og nitapon si Lumain og laing partido magpabilin gihapon siya nga kandidato sa NPC sanglit mao man ang anaa sa iyang Certificate of Nominations and Acceptance (CONA). (BANAT NEWS)