Anaa sa ‘narcolist’ angayang imbestigahan una ipagawas

CEBU, Philippines — Mga kadagkuan sa simbahan ug mga grupo nga naglihok alang niini, malaumon nga dili usa ipagawas ang listahan sa mga opisyal o mga tawo nga nalambigit sa ilegal nga drugas hangtod nga dili kini masusi pag-ayo.

Si Cebu Archbishop Jose Palma nasubo sa plano nga pagpagawas sa listahan sa mga nalambigit sa ilegal nga drugas apan kini nagkanayon nga dili siya makapugong sa mga opisyales sa pagpagawas niini kay ila man kining katungod.

Apan alang niya nga sa dili pa kini ipagawas, angayan usa kini paladman ug imbestigahan kay luoy usab ang mga inosente nga nalakip sa lista nga posibleng gisabutahe sa naglagot niini.

Sumala ni Palma, angayang pasakaan og kaso kadtong anaa sa listahan aron masuta nga aduna gyud kini nahimo nga kalapasan.

Alang sa arsobispo nga gikinahanglan ang dugang pagtuon ug pagsusi sa maong listahan kay sa higayon nga maguba ang reputasyon sa usa ka tawo, dili na kini mabalik pa.

Mao sab kini ang baruganan sa tsirman sa Commission on the Laity sa artsediyosis nga si Fe Barino.

Matud niya nga angayang susihon ug paladman ang imbestigasyon sa mga pangalan nga anaa sa narcolist kay nahadlok siya nga basin unya adunay uban niini ang walay kamatuoran ug mahimong judgmental ang katawhan bisan ug wala pa mapamatud-i.

Ang pagsusi sa maong listahan alang ni Barino dili lang sa pagprotektar sa pamilya sa mga nalambigit lakip na usab niini ang stigma sa tibuok pamilya diin usa ra ang nakasala apan daghan ang maapektuhan. (/DILT)(BANATNEWS)