Lahug River limpyohan karon, gilauman daghang motabang

CEBU, Philippines – Moabot sa singko mil ka volunteers ang motabang unya sa Cebu City Environment and Natural Resources Office (CCENRO) sa paglimpyo sa Lahug river.

Ang pangulo sa CCENRO nga si Ma. Nida Cabrera miingon nga adunay daghang tunghaan sa siyudad ang mipasalig nga moapil sa river clean-up karong adlawa. Samtang ang ubang volunteers gikan sa Busines Process Outsourcing (BPO), Non-Governmental Organization ug business establishments. Magsugod ang river rehabilitation ug restoration alas 6:30 sa buntag nga pangulohan sa CCENRO, Environmental Management Bureau, Department of Public Services ug ubang concerned agencies.

Magbutang sab sila og bio-fences sa kasapaan nga ginama sa recycled plastic bottles nga giputos og pukot nga maoy mosawod sa mga basura nga naa sa sapa.

Ang Lahug river adunay gitas-on nga 16 kilometros ug nagsubay sa kabarangayan sa Tejero, Tinago ug T. Padilla.

Si Cabrera miangkon nga ang Lahug river daghan og basura itandi sa Bulacao river kay sagad sa mga kabalayan nga nahimutang duol niini, walay septic tank ug ang hugaw sa mga residente deretso sa sapa. Sa pagkakaron, adunay nagpadayon nga profiling sa mga waste contributors sa maong sapa ug ang CCENRO makigkita nila aron sa pagtubag sa problema.

“Naa nami nakontak nga mo-provdie nato (og) tanke ibutang didto, kalot and semento, takuban siya, limpyo na ang mogawas nga tubig. Ga-expect ta ang mga lugar nga walay kasilyas butangan ana”, dugang ni Cabrera.

Ang sunod nga river clean-up mahitabo karong Marso 16 sa Guadalupe river. (/DILT)(BANAT NEWS)