Duha ka giingong durugista nasikop

CEBU, Philippines – Usa ka dakong plastik nga dunay sulod nga marijuana ang nasakmit atol sa gipahigayong buy bust operation sa kapolisan diha sa Sitio Tangke 2, Barangay Mambaling niadtong Lunes sa gabii.

Sa maong operasyon nasikop si Sander Bulahan Zulueta, 20, residente sa maong dapit.

Base sa report sa Mambaling Police Station nga positibong napalitan si Zulueta og usa ka medium nga pakete sa mga pinaugang dahon sa marijuana.

Laing usa ka dakong plastik ang nadeskobrehan sa kapolisan gikan sa posisyon ni Zulueta diin aduna kini sulod nga 15 ka medium nga pakete sa mga pinaugang dahon sa marijuana nga nitimbang kini ngadto sa 160 gramos ug mobalor ngadto sa P19,200.

Ang hepe sa kapolisan sa Mambaling, Police Captain Francis Renz Talosig nibutyag nga bag-o  lang nailhan sa kapolisan si Zulueta human sa mga nadawat nga mga reklamo  kabahin sa ilegal nga negosyo niini.

“May mga text complaints na tayong natanggap at may walk-in informant din po tayo na nag-report”, matud ni Talosig.

Sa laing bahin, usa ka lalaki nga nagbitbit og ginadiling drugas ang nasikop sa mga sakop sa Regional Mobile Force Battalion (RMFB)-7 diha sa Sitio Galaxy, Barangay Tanke, Dakbayan sa Talisay niadtong niaging adlaw.

Ang suspetsado mao si Rally Gabas alyas “Ral”, 50-anyos, nagpuyo sa maong lugar.

Ang mga sakop sa RMFB pinangulohan ni Police Lieutenant Jan Ace Elcid Layug nagpahigayon og foot patrol sa lugar.

Giingong ilahang nasugatan ang suspetsado nga kadudahan ang lihok hinungdan nga ila kining gisita.

Si Gabas giingong nakuhaan kini sa mga polis og lima ka gagmay nga pakete sa shabu. (Gabriel C. Bonjoc/BDB)(BANAT NEWS)