Ababon: Gidaghanon sa insidente sa sunog taas karong tuiga
CEBU, Philippines – Mga insidente sa sunog sa Dakbayan sa Sugbo taas ang gidaghanon kompara sa nilabay’ng tuig sa susamang buwan sa Enero ngadto sa Peberero.
Kini ang gitug-an ni Fire Chief Inspector Noel Nelson Ababon nga nahinabi sa mga tigbalita subay sa kasaulogan sa fire prevention month.
Matud ni Ababon nga sa nilabay’ng tuig aduna lang kini 36 ka insidente sa sunog ug adunay danyos nga P806, 693, 700 samtang karong tuiga adunay 73 ka insidente sa sunog ug nidanyos og P5, 883, 200.
Matud usab ni Ababon nga padayon pa nga gipaubos sa imbestigasyon ang sunog nga niulbo sa Sitio Tabucanal, Barangay Pardo, Sitio Paradise 2, Barangay Kinasang-an, Sitio Calero, Barangay Tinago, White Road, Barangay Inayawan ug Sitio Care, Purok 8 Barangay Camputhaw.
Gitug-an ni Ababon nga ang nag-una nga hinungdan sa sunog mao ang electrical connection, linuto nga biniyaan ug upos sa sigarilyo.
Si Ababon niawhag sa katawhan nga kanunay’ng magmatngon ilabi na nga panahon na karon sa ting-init ug kadaghanan mogamit sa ilang mga appliances.
Dugang ni Ababon nga padayon usab ang ilang gihimo karon nga Oplan Ligtas Pamayanan ilabi na sa mga lugar nga fire prone area o densely populated area diin naghatag sila og mga awareness program sa katawhan aron sa paglikay sa sunog. (/BDB)(BANAT NEWS)
- Latest
