Eugene Espedido batok Paz Radaza

CEBU, Philippines — Si Lapu-Lapu City Lone District Congressional aspirant ug kanhi three-termer councilor nga si Atty. Eugene Espedido, mahinangpon sa iyang pagbalik sa politika.

Tungod sa panawagan ni Presidente Rodrigo Duterte nga tabangan siya sa pagsulbad sa mga problema, hinungdan nga gitanyag niya ang iyang kaugalingon pagbalik nga magpapili isip kaatbang ni Mayor Paz Radaza alang sa pagdala sa tingog sa mga Oponganon sa kongreso.

Matud ni Espedido, ang pagka highly urbanized city sa Lapu-Lapu gikasubo niya kay kutob lang sa ngalan kay kon suroyon ang siyudad, mao ra kini ang lugar sa tibuok kalibutan nga anaa sa tunga sa karsada ang merkado.

Sumala niini, ang gipakita lang sa administrasyon mao ang nindot nga airport ug mga 5-star hotels apan ang tinuod nga hulagway sa dakbayan sama sa pagbaha ug ang problema sa mga informal settlers, wala masulbad.

Dugang niya nga ang pag-angkon nga malambuon ang siyudad, kun kumpleto sa mga kagamitan ang mga tunghaan lakip na ang pagpa-eskwela sa tanang kabataan.

Si Espedido, mihagit karon sa iyang kaatbang sa pag-uli sa mga budget sa gilambigit niini nga mga kontrobersiya.

Giangkon niya nga tungod kay ang pagka-kongresista mao man ang pagpanday og balaud, aduna siyay bentaha niini kay usa man siya ka abogado. (BANAT NEWS)