CEBU, Philippines — Gihangop sa kapin 200 ka pamilya nga nagpuyo sa luna sa luyo nga bahin sa kontrobersiyal nga Big Hotel sa Mantawi Drive sa Barangay Tipolo, Dakbayan sa Mandaue, ang lakang sa kagamhanan nga temporaryong pag-undang sa operasyon niini sanglit malangan man usab ang ilang pagpuyo sa maong dapit.
Gisirad-an ang naasoy nga hotel ug laing duha pa ka mga establisamento gumikan usab sa ilang tinguha sa pagsakto sa kakulian sa kontrata sa pag-ukopar sa luna nga gipanag-iya sa kagamhanan sa Mandaue.
Sa nasayran, niadtong tuig 2017 pa sila gipapahawa sa luna nga ilang gipuy-an kay gamiton na ang maong dapit sa Big Hotel nga kabahin sa ilang giabangan sa Katumanan Hardware.
Ang maong kalambuan, gikumpirmar ni Vice Mayor Carlo Fortuna kinsa miingon nga sayo ning tuiga miduol sa City hall ang mga residente ug nangayog kasayuran sa ilang relocation sa higayon nga sila papahawaon.
Matud ni Fortuna nga iyang gitubag ang mga residente nga walay laraw ang kagamhanan sa pagpahawa kanila. Dinhi na nasayran nga ang kompaniya nga nag-abang sa luna sa siyudad maoy nagpapahawa sa mga residente.
Nunot sa maong kontrobersiya gipadayag ni 6th District Congressman Jonas Cortes ang kabalaka sa pagsibog unsa sa mga negosyante gumikan sa gihimong mga lakang sa kasamtangang administrasyon.
Giangkon ni Cortes nga sukad pa sa iyang amahan nga si anhing Mayor Demetrio Cortes, sa panahon ni anhing Mayor Alfredo Ouano ug anhing Mayor Thadeo Ouano hangtod sa iyang paglingkod niadtong tuig 2007, ilang gipaningkamutan nga mahimong business friendly ang Mandaue. (/DILT)(BANATNEWS)