Kampanya batok dengue ug tipdas gihimo

CEBU, Philippines – Misaka ngadto sa 231 porsiyento ang pagtaas karon sa mga nasakit sa dengue kon ikumpara sa milabay nga tuig sa susamang panahon; Enero ngadto sa Pebrero 25.

Matud ni Dr. Shelbay Blanco, pangulo sa Health Emergency Management Bureau sa Department of Health-7 nga usa ang bag-ong nakalas sa dengue, taga Dakbayan sa Lapu-Lapu, hinungdan nga miabot na ngadto sa 29 ang nakalas.

Nasayran nga anaa na sa 4, 089 ka kaso ang natala, mas taas kini kon itandi sa milabay nga tuig nga aduna lay 1, 232 ka kaso ug 5 ang namatay.

Si Blanco nagkanayon nga nag-una sa listahan sa daghang kaso sa dengue mao ang Cebu City - 473 ka kaso ug 5 ang patay, Lapu-Lapu City - 389 ug 1 ang patay, Mandaue City - 233 ka kaso ug 1 patay, Dumaguete City -147 ug 1 patay ug ang Danao City - 93 ka kaso. Si Blanco, mitug-an nga nakita nilang suportado ang ilang mga kampanya ilabi na sa pagpamakuna sa mga kabataan.

Usa na niini ang Dakbayan sa Mandaue nga mihimo og house to house nga pagpangbakuna alang sa paglikay sa sakit nga tipdas.

Matud ni Dr. Edna Seno, ang health officer sa dakbayan nga hinay-hinay na nga nawagtang ang kahadlok sa mga tawo bahin sa bakuna kon itandi sa miaging tuig.

Lakip nilang gihingusgan nga kampanya batok sa sakit nga dengue pinaagi sa pag-awhag sa katawhan ang pagpanglimpiyo sa ilang palibot. Romeo T. Limpangog (BANAT NEWS)