Laing 2 ka bata patay sa tipdas

CEBU, Philippines – Laing duha ka mga batang babaye ang labing uwahing nakalas tungod sa sakit nga tipdas nga maoy gitug-an sa Department of Health-7.

Si Dr. Shelbay Blanco, Coordinator sa Health Emergency Management Staff sa DOH-7, nagkanayon nga  usa ka bata sa Consolacion ug ingon man usa ka masusu sa Barangay Ibo, Dakbayan sa Lapu-Lapu ang kompirmado nga namatay tungod sa tipdas.

Gitug-an ni Blanco, tungod sa outbreak sa tipdas, daghan sa mga ginikanan ang mangunay na sa pagdala sa ilang mga anak sa mga health center ug health facility aron sa pagpabakuna sa mga bata.

Si Blanco, nibutyag aduna silay igong supply sa mga bakuna, ug andam sila modugang ngadto sa mga health facility ug supply kung sila mahutdan basta moreport lang gayud sa ilahang buhatan.

Sa labing ulahing taho  nga natala sa DOH 7, miabot na ngadto sa 475  ka mga kaso sa tipdas dinhi sa  Central  Visayas ug lima ang natala nga namatay. Kini mao ang gipagawas sa Regional Epidemiology and Surveillance Unit head sa  DOH-7.

Sa miaging semana sa rehiyon ilang natala ang  433  ka mga kaso sa tipdas ug tulo ang natala nga namatay niini.

Ang lalawigan sa Sugbo mao pa gihapon ang nag-una sa  gidaghanon sa gitakboyan og tipdas nga naglangkob sa  336  usab ka mga kaso ang padayon pa nga gibantayan niining mga panahona. - Romeo Limpangog/LPM (BANAT NEWS)