CEBU, Philippines — Subay sa pagpasaka og kaso batok sa hinigugma ni Ashley Abad nga si Nel Spencer Tiu, si Police Regional Office-7 director Police Chief Superintendent Debold Sinas miingon nga ila nang sirad-an ang kaso sa kamatayon sa dalaga.
“We have to close the case”, si Sinas nagkanayon.
Si Sinas miingon nga dili na sila manghilabot sa maong kaso ug ang korte na ang bahala sa pagsusi sa mga ebidensiya subay sa kasong homicide nga gisang-at ni Jose Alfonso Abad, ang amahan sa 19-anyos nga si Ashley batok kang Tiu.
“Dili naman hands-off, the case is resolved, but it is up to the prosecutor,” matud ni Sinas.
Kahinumduman nga ang kampo ni Ashley nga gipangulohan sa amahan niini, hingpit nga mipasaka og kaso sa Cebu City Prosecutor’s Office niadtong miaging Biyernes, Pebrero 23, kapin sa usa ka buwan sukad namatay si Ashley gumikan sa giingong na overdosed sa ecstacy atol sa usa ka party subay sa kasaulogan sa Sinulog niadtong Enero 19.
Basi sa affidavit ni Jose Alfonso, giingong gidani ug gi-pressure si Ashley sa pagtumar og usa ka tibuok nga “silver skull” – usa ka matang sa ecstasy – apan giingong katunga ra ang giinom sa dalaga.
Gikatahong si Tiu usab ang mihangyo sa presyo sa ecstasy tablet gikan sa P1,700 ngadto sa P1,600 gikan sa usa ka ginganlan og Brian.
Gilakip sa mga ebidensiya nga gi-presentar sa kampo ni Abad, mao ang screenshot sa mga mensahe sa manag-uyab human masusi ang cellphone ni Ashley sa Philippine National Police Crime Laboratory. Subay sa maong kalambuan, ang abogado ni Tiu nga si Atty. Orlando Salatandre nagkanayon nga bukas sila sa pagpasaka sa maong kaso aron ilang matubag ang tanang alegasyon batok sa iyang kliyente.
Matud niya nga anaa ra sa Sugbo si Tiu ug wala kini magtago-tago.
Si Sinas midugang nga mahimo nilang ablihan pag-usab ang kaso ni Ashley kon adunay bag-ong kalambuan subay niini sama sa dugang mga pamahayag subay sa hitabo ug dugang mga ebidensiya. Dugang niya nga aduna silay himuon nga follow-up investigation aron mahibaw-an kon diin gikan ang ecstacy nga gigamit nilang Ashley ug Tiu.
Iyang gibutyag nga sukad sa ilang gihimo nga anti-drug operation batok ni Ken Kenneth Rosales, kinsa namatay human nakigpinusilay sa kapolisan atol sa buy-bust, mihinay-hinay sa ilang operasyon ang mga dealer og ecstacy. (/DILT)(BANATNEWS)