Mga gwardiya gidakop tungod sa gun ban

CEBU, Philippines — Mga gwardiya sa Plaza Independencia  gidakop tungod sa kalapasan sa Comelec gun ban human nga walay mga gun ban exemptions ug kuwang sa mga dokumento ang ilang mga armas nga gidala-dala samtang nagtrabaho.

Ang pagkasakop kanila nahitabo human nga ang Regional Civil Security Unit-7 naghimo og kinalit nga inspeksyon sa plaza  nunot sa pagpangandam sa seguridad sa pagabot ni Pres. Rodrigo Duterte alang sa rally kagabii.

Sigun pa ni Senior Police Officer 3 Glen Facturan, Chief Clerk sa RCSU-7, nga niadtong Pebrero 21, adlaw’ng Huwebes nagpahigayon sila og inspeksyon  ug didto ilang nadiskubrehan ang upat ka mga gwardiya nga walay igong mga dokumento sa mga armas ug sa ilang pagka-gwardiya.

“Walay silay lisensya sa pusil ug security guard license,  license to excercise security profession. Kung wala ana, subject confiscation of firearm,”si Facturan miingon sa Banat News. Nasuta usab nga wala silay kopya sa Comelec gun ban exemption sa mga armas nga ilang gidala. Matud pa niya tulobagon kini sa ilang security agency nga mao untay moproseso niini ngadto sa Comelec.

Ang hepe sa Waterfront Police station nga si Police Senior Inspector Jomar Pomarejos miila sa upat nga silang:Rodrigo Ducay Negrido 43, ubos sa SS7 Security Agency; ug silang Plorian Lumactod Hangca, 40, Ison Garganera Benitez 23, ug Severo Castañares Arcala ,32,  sakop sa Proteger Security Agency.

Si Facturan miingon nga ilang pasakaan og kasong administratiba ang maong mga security agencies, samtang kasohan usab ang mga gwardiya tungod sa paglapas sa gun ban.

Si Police Chief Superintendent Debold Sinas, director sa Police Regional Office-7 mibutyag nga paltik ang mga armas nga gidala sa maong mga gwardiya.

“Kadalasan sa security guard ilang pusil wala’y lisensya, walay exemption tapos paltik pa, kapag paltik automatic na (dakpon),” pasidaan ni Sinas.

Giawhag niya ang mga security agency nga palisensyahan gyud ang mga armas nga ipagamit sa ilang mga sakop ug mokuha gyud sa mga gikinahanglang mga papeles sama sa gun ban exemption sa Comelec.

“Naa na sa balaod, ikaduha dapat licensed and naay exemption .. this should serve as a warning to all security agencies,” si Sinas nagkanayon.  Base sa Comelec Resolution Number 10197, ang mga regular nga sakop sa Philippine National Police, sa Armed Forces of the Philippines, ug uban pang law enforcement agency mamahimong maghupot og armas kung: Nagsul-ob kini og kompletong uniporme, ug on duty kini.

Samtang mamahimo sab nga mo-apply og exemption ang mga pribadong indibidwal, security agencies o kompanya. (/IBM)(BANATNEWS)