CEBU, Philippines — Gipahigayon kagahapon sa buntag ang unveiling sa Don Vicente Rama brass monument sa Rama Compound, Barangay Basak San Nicolas, Siyudad sa Sugbo.
Sa wala pa gihimo ang maong kalihukan, usa ka santos nga misa una ang gipahigayon nga gipasiugdahan ni Cebu Archbishop Jose Palma.
Kahinumduman nga tulo ka senatoriables ang giimbitar ni kanhi mayor Michael Rama nga gilangkuban nila ni Nancy Binay, Christopher “Bong” Go ug Harry Roque aron motambang sa maong kalihukan.
Sa tulo nga giimbitar, si Senator Nancy Binay lang ang nakatambong, samtang naa usab ang mga kaubanan sa kanhi mayor sa Partido-Barug.
Nasayran ang maong kalihukan subay na sab sa 82nd Charter Day Celebration karong adlawa, diin si Don Vicente Rama maoy amahan sa Cebu City Charter Day.
“I wish that our generation, that is my pleading while I’m still alive please do not let anyone erase the Charter Day”, mensahe ni Rama.
Nasayran nga si Rama kaalyado gihapon sa United Nationalist Alliance (UNA) diin ang amahan ni Senador Binay nga kanhi bise president Jejomar Binay maoy nangulo.
Si Rama modagan pagka-bise mayor sa Siyudad sa Sugbo ug si Senator Binay miasoy nga gihisgutan na nila kon unsa nga suporta ang ihatag sa UNA sa grupo sa kanhi mayor.
“Ayon pinag-uusapan because alam naman natin yung history ng UNA, yung Team BARUG, so at the moment pinag-uusapan pa yung alliance between the two parties”, ni Senator Binay pa.
Si Binay misanong sa imbitasyon ni Rama kay kini duol kaniya sanglit nakapahigayon siya og proclamation rally dinhi sa Sugbo unom ka tuig na ang nakalabay uban ni Rama. DILT (BANATNEWS)