P31 milyon drugas sakmit ug walo patay sa SEMPO

CEBU, Philippines —  Walo patay ug 520 ka tawo ang nadakpan sa gipahigayong 48 oras nga Synchronized Enhanced Managing Police Operation (SEMPO) sa  dakbayan ug Probinsiya sa Sugbo sugod niadtong Huwebes sa tungang gabii.

Sa maong operasyon nikabat ngadto P31 milyones nga balor sa ilegal nga drugas lakip na ang party drugs ug mga nalarot nga marijuana nga nikabat ngadto sa P8 milyones ang kantidad didto sa Barangay Gaas, Lungsod sa Balamban niadtong Biyernes. Kini base sa datos nga giluwat sa Police Regional Office-7 nga gisugdan ang maong operasyon niadtong Huwebes sa tungang gabii ug opisyal nga gitapos kaganinang tungang gabii.

Sa 520 nga dinakpan 194 niini nadakpan sa buy-bust operation; 136 sa warrant of arrest sa nagkadaiyang kaso; 128 sa illegal gambling;  14 sa illegal fishing; 33 kabuok nadakpang nagdala og ilegal nga armas atol sa checkpoint ug 15 kabuok nasikop sa search warrant sa kasong illegal possession of firearms.

Sa maong 15 lakip niini ang duha ka opisyal sa Barangay Calamba nga sila si Victor Borres Quijano Jr., kapitan sa Calamba; Anthony Gingoyon, hepe sa tanod ug si Ramsey Mercado, barangay konsehal sa nahisgutang barangay.

Lakip sa mga dinakpan sa maong buy-bust operation silang Justin Anton Jimenez 21 ug Lorenz Jasper Famos Yap, 22, kinsa nakuhaan og mga party drugs.

Samtang ang patay niabot ngadto sa walo kabuok ug sa ulahing datos si Leonidea Barcelona alyas “Dako” maoy napuno sa kaniadtong unang pito.

Matud sa deputy chief sa Cebu Provincial Police Office nga si Senior Inspector Alejandro Batobalonos nga nagsilbi ra sila og search warrant kang Faisa Jarantilla Dadhi diha sa Camotes compound, Barangay Poblacion 1, Dakbayan sa Carcar.

Si Dadhi giingong kapuyo sa usa ka Jay Camotes kinsa natanggong na karon diha sa Cebu City Jail tungod sa ilegal nga drugas. Nasakmit sa mga polis sa maong operasyon ang tunga sa kilong shabu nga nikantidad tanan ngadto sa P3.5 milyones.

Lakip sa mga napatay sila si Ken Kenneth Rosales; mga tanod sa barangay Lusaran, Dakbayan sa Sugbo nga silang Renato Bughaw Goc-ong ug si Reynaldo Laguna ug asawa ni Renato nga si Emma; sa Barangay Maya, Daanbantayan; Cristory Monteadora sa Barangay Pilipog, Cordova; si Librador Abayan alyas “Badong” 32, lumad nga taga Ermita, Dakbayan sa Sugbo ug usa ka nailhan lang nga Moises.

Samtang sa Dakbayan sa Talisay nasikop kagahapon sa buntag diha sa Sitio Paglaum, Barangay Dumlog si Edwin Sevial, 29, habal-habal driver, residente sa maong dapit kinsa giingong namaligya og ilegal nga drugas.

Nasakmit sa mga polis gikan sa suspetsado ang pito ka gagmay’ng pakete nga shabu, kalibre .38 revolver nga dunay tulo ka mga bala.  Rowena D. Capistrano, Romeo T. Limpangog ug Gabriel C. Bonjoc BDB (BANATNEWS)