Yapha gipadalhan og paskin nga dunay mga bala
CEBU, Philippines — Ang kandidato sa pagkakongresista sa ikatulong distrito sa Probinsiya sa Sugbo Geraldine Yapha ang nakadawat og hulga sa iyang kinabuhi.
Si Yapha nibutyag nga kagahapon sa buntag samtang nanglimpiyo sa iyang Hilux nga sakyanan ang iyang drayber nga si Rex Zamora nakamatikod kini og usa ka kinumot nga papel.
Si Zamora nagtuo nga usa lang kadto ka basura apan dihang gibukhad niya kini adunay gisukip nga duha ka bala ang maong papel.
Nakasuwat usab diha sa maong papel nga paatrason si Yapha sa iyang pagdagan karong midterm election diin ang maong duha ka bala alang kang Yapha ug Zamora kong si Yapha dili mo-withdraw sa kandidatura.
Matud ni Yapha nga ang ilang sakyanan naa kini nila iparada sa daplin sa karsada sulod sa ilang subdivision diha sa Barangay Labangon, Dakbayan sa Sugbo tungod kay dili kini masulod sa ilang garahe.
Si Yapha nagkanayon unang higayon pa kini nga nakadawat siya og hulga sa iyang pagdagan.
Naalarma si Yapha hinungdan nga nagpa-blotter kini kagahapon diha sa Cebu Provincial Police Office sa maong adlaw ug gitug-an ngadto sa kapolisan kon kinsa ang iyang mga gipangdudahan nga nagpaluyo niini.
Si Yapha giingong mohangyo ngadto sa Comelec nga tugotan siya nga hatagan og police security.
Samtang ang direktor sa CPPO si Police Senior Superintendent Manuel Javier Abrugena nagkanayon nga ilaha pang tun-an ang maong gikatahong pagpanghulga.
“We will be closely monitoring her activities and shall provide appropriate security coverage according to the set of rules provided by the PNP”, matud ni Abrugena. BDB (BANAT NEWS)
- Latest
