Konektado sa warehouse nga gironda

CEBU, Philippines — Duha ka kilo sa gituohang shabu ang nasakmit gikan sa usa ka Danilo Dela Cerna kinsa giingong konektado sa balay nga gihimong warehouse sa Dakbayan sa Mandaue.

Gibutyag ni Police Regional Office-7 director Debold Sinas nga ilang gibasehan ang putos ug sa klase sa drugas nga nakuha.

Niadtong Pebrero 8, gironda sa kapolisan ang duha ka andanang balay sa Vista Montana Subdivision, sa Brgy. Casili, Dakbayan sa Mandaue diin nakuha ang pito ka kilong shabu.

Ang maong drugas susama sa nasakmit sa mga sakop sa Philippine Drug Enforcement Agency didto sa Dasmariñas, Cavite ug dad-on kini sa naasoy nga warehouse diin usa sa nasuplayan mao si Dela Cerna.

Laing gibutyag ni Sinas nga dili na sila makaila sa mga drug courier sanglit puros mga bag-o na kini ug giingong  ang transkasyon nila sa drugas diin igo na lang ipadala ang butang ngadto sa   mo-order.

Dihang nasikop si Dela Cerna, nasikop sa gihimong follow-up operation sa Brgy. Mambaling sila si Pamela Gonzales ug Samuel Belarmino.

Ang duha nadakpan sa buy-bust operation diin nakuhaan sila og 85 ka gramo nga mobalor og P570 mil. Sa Brgy. Tanke sa Dakbayan sa Talisay, duha ka tawo ang nasikop human masakpi nga nagbitbit og ginadiling drugas niadtong Domingo.

Unang nasikop mao si Danilo Daan, 62-anyos, minyo, taga Sitio Tunga kinsa nakuhaan og walo ka gagmayng pakete sa gituohang shabu.

Nasakpan kini sa mga sakop sa Regional Mobile Force Batallion (RMFB) nga nadestino sa maong lugar dihang mipahigayon sila og foot patrol.

Sa Sitio Sawsawan nasakpan si Ariel Abangan, 42-anyos, ulitawo nga taga Greenfield, Brgy. Inayawan, Cebu City.

Tulo ka gagmay’ng  pakete sa gidudahang shabu ang nakuha gikan niini. Gipriso na ang duha ug giandam na ang tukmang kaso batok kanila. (Gabriel C. Bonjoc/DILT)(BANATNEWS)