CEBU, Philippines — Makabayad og multa ang mga drayber nga molabay sa Lungsod sa Consolacion kon magpakusog og dagan subay sa ilang gipatuman nga ordinansa.
Makabayad og P500 ang drayber alang sa unang kalapasan ug patambungon og upat ka oras nga road safety seminar. Sa ikaduhang higayon, pamultahon og P1,500 ug upat gihapon ka oras nga seminar. Sa ikatulong higayon, adunay multa nga P2,500 ug i-impound na ang sakyanan o matanggong sa bilangguan sulod sa 30 ka adlaw ang drayber niini.
Gipatuman sa kagamhanan ang maong ordinansa tungod sa nagkadaghan na nga mga establisamento sa lugar, daghang tawo nga manglabang sa dalan ug nagkadaghan na usab ang manglabay nga mga sakyanan.
Sa Ordinance No. 27, gitugotan lamang ang mga motorista sa pagpadagan og 40 kilometros matag oras ang gikusgon sa dagan kon magsubay kini sa mga provincial roads ug 30 kilometros usab sa matag oras kon magsubay sa municipal road.
Labing hinay nga mao ang 20 kilometro matag oras ang dagan sa mga dalan nga adunay daghang tawo nga manglabang nga naglakip sa mga eskina og mga tulunghaan. Gitumong ang speed limit sa tanang matang sa mga sakyanan nga naglakip sa mga pasaheroan, delivery truck ug uban pa. (/DILT)(BANATNEWS)