P500 mil shabu sakmit gikan sa duha ka pusher
CEBU, Philippines – Nikabat ngadto sa P500 mil ang balor sa ilegal nga drugas ang nasakmit sa gipahigayong buy-bust operation sa City Drug Enforcement Unit ug Mambaling Police Drug Enforcement Unit niadtong Huwebes, Pebrero 14 diha sa Sitio Tagunol, Barangay Pardo ug Sitio Duco, Barangay Duljo, Dakbayan sa Sugbo.
Unang operasyon nahitabo diha sa Sitio Tagunol, Barangay Pardo, niadtong Huwebes sa tungang gabii diin nasikop si Victor Cabanes Centillas, hingkod ang panuigon, residente sa Sitio All Season, Barangay Pardo.
Nasakmit gikan kang Centillas ang usa ka gamay’ng pakete, laing 20 ka gagmay’ng pakete ug laing 10 ka medium nga pakete nga gituohang shabu nga nitimbang ngadto sa 50 gramos ug nibalor ngadto sa P340,000 ug usa ka digital weighing scale.
Laing operasyon gipahigayon diha sa Sitio Duco, Barangay Duljo, Huwebes sa kadlawon diin nasikop si Elias Sano Palapar, residente sa maong lugar.
Si Police Chief Inspector Francis Renz Talogsig maoy nangulo sa maong operasyon.
Nasakmit gikan ni Palapar ang usa ka gamay’ng pakete, laing unom ka gagmay’ng pakete ug upat ka medium nga pakete nga gituohang shabu nga nitimbang ngadto sa 20.42 gramos ug nibalor ngadto sa P138,856 nakuha usab gikan sa suspetsado ang P800 nga gituohang halin sa ilegal nga drugas.
Ang maong mga suspetsado mag-atubang og kasong kalapasan sa Sec. 5 ug Sec 11 sa Art II Akta Republika 9165 kun “Comprehensive Dangerous Drugs Act of 2002”. (/BDB)(BANAT NEWS)
- Latest
