CEBU, Philippines – Mga traffic enforcers sa Cebu City Transportation Office (CCTO) mamahimo nang makakompiskar og driver’s license sa mga malapasong motorista, apan kinahanglan pa silang ipaubos pa sa pagbansaybansay karong buwana.
Kini maoy gibutyag ni CCTO operations head Francisco Ouano i-refresh nila og balik ang mga traffic enforcers aron sab mahinumdom sila kung unsay saktong buhaton sa pagpanakop.
Karong buwana nila kini ipatuman bisan pa man og dunay warning gikan sa Land Transportation Office (LTO)-7 nga supak labot sa maong plano.
Matud pa ang pagpatuman sa CCTO gipaluyohan og ordinansa sa siyudad nga nagtugot kanila nga mokompiskar og driver’s licenses sa mga motorista nga malapason sa lagda sa trapiko nga gipirmahan ni Mayor Tomas Osmeña niadtong 2018.
Ang maong ordinansa gisupak sa LTO-7 base sa Republic Act 4136 kun Land Transportation and Traffic Code nga naglatid nga ang LTO ug ang ilang deputized agents lamang ang makakompiska og driver’s license.
Si Ouano miingon nga sayod sila nga naa sila’y atubangong kaso apan kini mitataw nga ang ilang gilantaw mao ang kaayuhan lang sa dakbayan.
Sa pagkakaron giumol pa nila ang adjudication board nga ilang giplanuhan nga mag-operate 24- oras aron sab kun dunay madakpan malukat ra sab nila dayon ang ilang lisensiya aron dili sab sila madakpan sa ubang lugar o siyudad.
Samtang mas daghan na unya ang makabantay sa dagan sa trapiko sa siyudad sa Sugbo karon nga ang Cebu City Transportation Office (CCTO) nang-hire og dugang 120 ka traffic enforcers niadtong buwan sa Disyembre sa miaging tuig. (/IBM)(BANAT NEWS)