CEBU, Philippines — Ang Siyudad sa Sugbo mag-schedule sa ikaduhang higayon og public bidding alang sa pagpalit og 19 ka 50-seater buses karong buwana.
Gibutyag sa pangulo sa General Services Office (GSO) Ronald Malacora kinsa chairman sa Bids and Awards Committee nga gideklara sa komitiba nga failure of bidding niadtong Huwebes tungod kay walay niapil sa bidding sa P152 million nga pagpalit sa 19 ka buses.
“Failure of bidding gyud siya. Among i-review og balik ang mga specifications and requirements if lisod i-meet sa mga suppliers,” matud ni Malacora kinsa nahinabi sa Banat News. Ang 18 sa 19 ka mga buses i-charge sa karong tuig nga annual budget samtang ang usa ka bus i-charge sa Supplemental Budget-4 sa niaging tuig.
Ang usa ka bus giingong nagkantidad og P8 milyones ug kahinumduman nga ang siyudad naggahin og P8 milyones alang sa pagpalit og usa ka bus sa niaging tuig.
Ubos sa Annual Budget karong tuiga ang siyudad nigahin og P232 milyones aron sa pagpalit og 40 ka buses alang sa free bus rides sa siyudad.
Gibutyag ni Malacora nga si Mayor Tomas Osmeña nihangyo nga i-prioritize ang pagpalit sa 19 ka mga dagko nga bus aron madugangan ang kasamtangang libreng sakay sa I.T. Park, Barangay Talamban area, ug Barangay Bulacao area atol sa peak hours.
“As much as possible, walay mention nga unsay brand or country of origin.
As long as naay availability sa spare parts nga readily available sa markets. Previous experience nato nga atong gipamalit nga mismo ang supplier magkinahanglan og one month to order the items from outside of the country”, butyag usab ni Malacora.
Gawas sa nahisgutang mga bus, giingong laing 22 ka mini-buses unya ang ipa-bidding ni Osmeña kon mahuman na ang guidelines niini alang sa libreng sakay sa college students nga nagpuyo diha sa mga bukirang bahin sa siyudad.
Ang GSO una nang ni-identify og upat ka rota sa maong libreng sakay diin ang unang rota diha sa barangays Sudlon 1, Sudlon 2, Sinsin, Buot, Bonbon ug Babag; ikaduhang rota diha sa Barangay Tabunan, Tagbao, Adlaon, Taptap, Pung-ol Sibugay, Malubog, ug Busay; Ikatulong rota diha sa Barangay Guba, Sirao, Cambinocot, Agsungot, Pung-ol Sibugay, Malubog, ug Busay; ug ang ikaupat nga rota diha sa Barangays Lusaran, Paril, Mabini, Binaliw ug Pit-os. (/BDB)(BANATNEWS)