CEBU, Philippines — Uyab ug ang mga higala sa dalagang giingong namatay tungod sa gidudahang party drug ‘overdosed’ ipa-subpoena ni Chief PNP Oscar Albayalde kundili gihapon sila motumaw aron motabang sa imbestigasyon.
Ang direktor sa Police Regional Office-7 nga si Chief Supt. Debold Sinas miingon nga si Presidente Rodrigo Duterte mismo maoy mimando nga pasakaan og kaso ang responsable sa maong krimen.
"The president said that we have to file a case to set an example that we do not tolerate this," si Sinas miingon.
Base sa imbestigasyon giingong dunay mga timailhang adunay nagpugos kang Ashley Abad nga moinom og party drug nga usa gyud ka ecstasy.
"We have found out na there is a reason to believe na kadtong si Ashley is induced, naay naghatag," si Sinas nagkanayon.
"Our prime suspect is the boyfriend, now if dili gihapon siya mogawas, we will ask for the subpoena powers of the chief PNP para i-summon siya para kung dili gihapon siya, dakpon na namo siya,"matud ni Sinas. Giingong lakip sa dakpon kun di mokooperar ang mga higala nga nakauban sa biktima dihang nawad-an kini og panimuot.
Kasong negligence resulting to homicide ang ipasaka kanila kun magmagahi sila pagsanong sa imbestigasyon. Si Abad uban sa iyang mga higala ug uyab mitambong sa Plus 63 Music and Arts festival didto sa Cebu Business Park diin giingong didto kini nawad-an og panimuot.
Matud ni Sinas nga base sa eksaminasyon sa doktor matabang pa unta ang biktima kun nadali kini pagdala sa tambalanan.
Apan giingong nagtuo ra ang iyang mga kauban nga nahubog ra kini. (/IBM)(BANATNEWS)