Libreng sakay sa e-jeep hangtud sa Valentines

CEBU, Philippines – Gipahimuslan karon sa mga Oponganon ang libreng sakay sa paglusad kagahapon sa operasyon sa electronic jeepney (e-jeep).

Si Mayor Paz Radaza nagkanayon nga  libre ang sakay sa maong mga sakyanan nga namasahero sa Dakbayan sa Lapu-Lapu ug  molungtad kini hangtud sa Pebrero 14 o Valentine’s Day.

Ang e-jeep magsugod kini og pamasada gikan sa buntag hangtud sa gabii. Ang unang 25 ka e-jeep mamasahero kini diha sa kabarangayan sa siyudad ug giingong nagsilbi kining katumanan sa programa sa nasudnong kagamhanan ubos sa modernization of public land transportation sa nasud.

Matud ni Radaza nga gisuportahan sa kagamhanan sa dakbayan ang maong programa sa nasudnong kagamhanan ug ingon man sa pribadong sector pinaagi sa  Gaisano Capital Mactan  nga nigahin og 3,000 metro kuwadrado nga bakante nga luna habig na sa Sangi New Road, Barangay Pajo  nga maoy nagsilbing garahian ug charging station sa e-jeepney.

Gibutyag ni Radaza nga gipagamit sa maong kompaniya ang ilang pribadong luna nga molungtad hangtud sa 25  ka tuig  base sa gikauyonan sa usufruct agreement nga ilang gipirmahan ug sa mga kadagkoan sa Gaisano  Capital.

Naglakip sa mga rota nga agian sa e-jeepney ang merkado publiko sa Barangay Poblacion, Barangay Pajo, Pusok, Buaya,  Mactan, Punta Engaño, Maribago,  Agus, Marigondon, Suba-Basbas.  Basak, Gun-ob, Looc, Babag, Kalawisan ug ingon man Lungsod sa Cordova. (/BDB)(BANAT NEWS)