Napaig sa sunog

CEBU, Philippines – Usa ang patay ug dul-an sa 50 ka mga panimalay ang naugdaw sa sunog duh aka insidente sa sunog sa Dakbayan sa Sugbo kagahapong adlawa.

Ang unang sunog niulbo sa may Sitio Calero, Barangay Tinago, nga nagsugod sa panimalay ni Wilfredo Jalandoni Jr.

Nadawat sa kabomberohan ang maong sunog alas  2:31 nga nilanat og duha ug tunga sa oras nga kombate ayha pa napawong sa mga bombero.

Matud pa ni Cebu City Fire Marshall Chief Inspector Noel Nelson Ababon, 15 ka mga panimalay ang naugdaw ug dili mominos P150 mil ang gibana-bana nga danyos

Apan dugang pa ni Ababon, nakalas sa maong sunog si Ehjay Fernandez, 30,  kansang napaig nga lawas positibong giila sa iyang pamilya kagahapon sa hapon diha sa nasunog ga lugar.

Matud pa  na-missing kini atol sa ug pagkahuman sa sunog.

Usa ka Brenda Jalandoni usab ang nakaangkon ug samad sa iyang tuong kamot ug tudlo tungod sa maong sunog.

Ikaduhang sunog nahitabo sa may Sitio Paradise 2, Barangay Kinasang-an, alas-4 pasado ug napawong alas-5 na sa hapon. Ang sunog nagsugod sa panimalay ni Victor Nadera, diin gibana-bana moabot ngadto sa P300 mil ang danyos.

Sumala pa ni Ababon, ipaubos pa nila sa imbestigasyon ang duha ka sunog aron masayran ang hinungdan niini.

Si Anna Marie Nadera kinsa usa sa mga nasunogan ug  nasamad sa agtang miingon nga napugwat sila sa ilang pagkatulog sa dihang nakadungog sa singgit sa iyang igsuon nga dunay nanimahong sunog.

Sunod nilang nakita nga nidilaab na ilang balay hinungdan nga gisaka siya ang iyang 14-anyos nga anak ug nagdungan sila sa pagpagawas. (/IBM)(BANAT NEWS)