CEBU, Philippines — Gitakda nga pasakaan karong adlawa og kaso nga anti-cybercrime ug child trafficking ang usa ka inahan nga nasakpan nga namaligya og malaw-ayng hulagway sa iyang anak niadtong Lunes didto sa lungsod sa Alcantara, Cebu.
Si Police Senior Supt. Romeo Perigo sa Women and Children’s Protection Desk miingon nga gitun-an na nila ang patong-patong nga kaso nga ilang ipasaka sa maong inahan.
Nasayran nga atol sa usa ka entrapment operation, usa ka inahan ang gidakop ug giluwas usab sa mga kapolisan ang duha niini ka mga menor de edad nga anak babaye nga nagpangedaron og 13-anyos ug 3-anyos. Lakip usab nga giluwas ang usa ka masusu nga pag-umangkon niini nga nag-edad pa og tulo ka semana. Butyag ni Perigo nga gi-videohan ug gikuhaan og hulagway sa suspek ang mga pribadong parte sa maong mga bata ug pinaagi sa internet, ipadala kini niya ngadto sa iyang mga kliyente nga nagbase sa Australia ug United States ilis ang kantidad nga 150 dollars.
Giingong niadtong Nobyimbre 2018 pa nagsugod sa maong illegal nga transaksyon ang maong suspetsado. Samtang, si Bise Gobernador Agnes Magpale kinsa maoy pangulo sa Provincial Women’s Commission nagkanayon nga bukas sila modala sa kostudiya sa mga bata hilabina nga aduna may development center ang Kapitolyo sa Sudlon dakbayan sa Sugbo. Le Phyllis F. Antojado/LPM (BANATNEWS)