CEBU, Philippines — Gidakop sa kapolisan ang tag-iya sa usa ka kan-anan diha sa Barangay Capitol Site sa Dakbayan sa Sugbo human gireklamong nanghinol sa iyang duha ka mga 20 anyos babayeng trabahante niadtong Lunes sa gabii.
Giila sa kapolisan ang suspek nga si Chad Colmenares Regner. Samtang gipugngan sa kapolisan ang pagpagawas sa mga pangalan sa mga biktima.
Sumala pa ni Police Officer 1 Maria Carmelita Cataylo nga mga probationary employees ang mga biktima . Sa ilang alegasyon, tagsa-tagsa silang gipasulod sa buhatan sa suspek ug didto nanghikap kini sa pribadong parte sa ilang mga lawas.
“Gipatawag daw kay nindot daw ilang performance mao ‘to nga nangayo og hug pagkahuman, gi lips to lips unya nanghinol sa mga pribadong parte,”sigun ni Cataylo base sa reklamo sa mga trabahante.
Pagkahuman sa ilang trabaho nidiretso pagreklamo sa kapolisan ang duha hinungdan nga gidakop si Regner sa mga polis. Gisuwayan sa tigbalita sa pagkuha og habig si Regner apan mibalibad kini.
Apan ang lima ka tuig nang kapuyo ni Regner nga si Tara Imbong, 34, midepensa kaniya.
Asoy niya sa Banat News nga anaa ra siya sa pikas kwarto dihang gikahinabi ni Regner ang upat nila ka mga trainees, lakip niini ang duha ka mga reklamante.
Matud pa gipahibalo silang upat nga nakapasar sila sa ilang lima ka adlaw nga training. Giingong wala ray 30 minutos nahuman na dayon ang maong pagpakighinabi ni Regner kanila.
Matud niini nga aduna silay Closed Circuit Television footages nga nag-atubang sa pultahan sa opisina diin makita kun unsay reaksyon sa mga dalaga dihang nanggawas.
“If you’re harassed nganong di man ka modagan?,” si Imbong nagkanayon. Nagduda siya nga buot gub-on sa maong mga reklamante ang ilang negosyo.
“What they want is ipapriso si Chad and ipasirado ang Bucket Shrimp? Which is dili mi mosugot kay gihagoan sad baya na namo,” sigun sa maong kapuyo kinsa miingon nga illegal ang pagdakop kang Regner kay walay warrant of arrest.
Matud niya mosang-at sila og counter charges batok sa mga reklamante ug sa mga polis.
Apan si PO1 Cataylo miingon nga dili illegal arrest ang ilang gihimo sanglit wala makalapas sa 48 oras gikan nahitabo ang krimen dihang ila kining gidakop. (/IBM)(BANATNEWS)