Seguridad sa Lapu-Lapu ug Talisay gibantayan

CEBU, Philippines — Mga polis ug opisyales sa kabarangayan sa Dakbayan sa Lapu-Lapu ang gitigom ni Mayor Paz Radaza alang sa seguridad.

Sa maong panagtigom ilang gituki ang mga hiniusang lakang alang sa pagmentinar sa kahapsay ug kalinaw ug kalikayan nga makasulod ang mga dautang elemento nga naglakip sa mga tulisan, terorista  ug uban pa.

Hinuon giingong walay report nga nahipos ang kapolisan sa siyudad kabahin sa hulga sa kahusay ug kalinaw.

Apan bisan pa niini padayon gihapon nga magbantay ang kapolisan ug nagkinahanglan usab kini og abag sa mga lumolupyo sa lugar aron mahingpit ang gitinguha nga kahapsay ug kalinaw sa mga Sugboanon.

Nunot niini, ang mga drayber sa traysikol nga gilangkuban sa mga sakop sa  Triycle Operator’s Driver’s Association  (TODA) nagkahugpong sa pagtabang sa kapolisan.

Si Police Superintendent Mark Gifter Sucalit, hepe sa City Intelligence Branch  (CIB) maoy  nag-preside  sa maong panagtigom.

Sa laing bahin, nunot sa travel advisory sa hulga sa terorismo sa habagatang bahin sa Lalawigan sa Sugbo ang hepe sa kapolisan sa Dakbayan sa Talisay Superintendent Marlu Conag nagkanayon nga luwas ang siyudad sa terorista.

Matud ni Conag nga padayon ang ilang pakig-alayon sa komunidad sa Muslim nga naa nagbase sa Talisay.

Gani dili lang sila ang nagpatuman o naniid sa seguridad sa siyudad lakip na niini ang pwersa sa Armadong Kusog sa Nasud nga naglibot-libot sa maong lugar.

Matud usab ni Conag nga adunay makita nga mga polis diha sa kadalanan sa siyudad aron sa pagpahigayon og checkpoints.

Dugang niini, dihang gisugdan ang Comelec checkpoints niabot na sa tulo ngadto sa lima ka tawo ang nakuhaan og armas ug napasakaan og kaso nga kalapasan sa Comelec gun ban. (Gabriel C. Bonjoc/BDB)(BANATNEWS)