Barangay Tanke mas mamonitor — polis

CEBU, Philippines — Human sa nahitabong sunog sa Sitio Galaxy, Barangay Tanke, Dakbayan sa Talisay niadtong Domingo giingong mas ma-monitor pa sa kapolisan sa siyudad ang mga ilegalista nga magsuroyan diha sa maong lugar.

Nasayran nga 87 ka panimalay ang naugdaw sa maong sunog diha sa maong lugar.

Si Superintendent Marlu Conag, hepe sa kapolisan sa Dakbayan sa Talisay nagkanayon nga nasubo siya sa panghitabo nga daghang nawagtangan og panimalay apan ang maong panghitabo mao usab ang nakahatag og kahigayonan kanila nga mas ma-monitor pa ang mga ilegalista nga padayon nagsuroy-suroy sa maong lugar.

Matud ni Conag nga kontrolado na sa Regional Mobile Force Battalion (RMFB) ang lugar apan aduna gihapo’y mga ilegalista nga padayon sa ilang kalihukan.

Sa laing bahin, ang operations head sa Division for the Welfare of the Urban Poor (DWUP) Genevieve Alcoseba nibutyag nga ang concern nila sa nahitabong sunog sa Sitio Tabucanal, Barangay Poblacion Pardo mao ang yuta nga gitukoran sa mga panimalay sa nasunogan tungod kay pipila niini pribado.

Matud ni Alcoseba nga makig-estorya sila sa mga tag-iya sa luna tungod kay kinahanglan nilang i-reblock ang lugar. Base sa na-identify sa DWUP tulo kabuok ang tag-iya sa yuta nga naglangkub sa Daclan, Kintar ug Dampios.

Karong adlaw’ng Biyernes gikatakda nga makig-meeting ang DWUP sa mga nasunogan.

Sa laing bahin usab, nahumana ang DWUP sa clearing operation diha sa pito ka sitio sa Barangay Duljo-Fatima nga naigo sa dakong sunog niadtong buwan sa Disyembre sa niaging tuig.

Si Alcoseba nagkanayon nga nagsugod na sila og sukod aron mahan-ay kon tagpila ang home lot allocation sa kada pamilya o estraktura nga apektado ug tinguha nila nga sa Pebrero 11 makahatag na sila og home lot assignment. (Decemay P. Padilla/BDB)(BANATNEWS)