Campaign posters gipamonitor sa Comelec

CEBU, Philippines — Nagsugod na og monitor ang Comelec sa mga campaign posters sa mga kandidato alang sa umaabot nga piniliay nga bisan asa ra gipamutang.

Si acting provincial election supervisor Atty. Jerome Brillantes nagkanayon nga iyang manduan ang mga election officers sa Lalawigan sa Sugbo nga susihon na ang ang “designated areas” kon asa mahimong ibitay o ipilit ang mga posters aron dali nang matangtang kadtong wala sa mga angay butangan niini. Matud ni Brillantes nga atol sa election period, magsugod na sila sa pagpadala og sulat sa mga kandidato nga tangtangon ang ilang posters sa mga punoan o kadtong gawas sa “designated areas”.

Sa pagkakaron, makapatuyang pa ang mga kandidato sa pagbutang sa ilang campaign posters apan inig sugod sa campaign period, panangtangon kini kon wala sa designated areas.

Ang campaign period alang sa mga modagan pagka senador ug party-list groups sa magsugod Pebrero 12 hangtod Mayo 11.

Samtang ang campaign period sa mga modagan sa pagka kongresista, gobernador, bise gobernador, bokal hangtod na sa mayor ngadto sa mga konsehal sa lungsod ug dakbayan magsugod sa Marso 30 hangtod Mayo 11. (BANAT NEWS)