Mga biktima sa sunog sa Duljo-Fatima makatukod na sa ilang balay
CEBU, Philippines — Mga 400 ka biktima sa sunog sa Barangay Duljo-Fatima ang gipaabot nga makatukod na og balik sa ilang mga balay karong Pebrero 11, 2019.
Ang technical team sa Division for the Welfare of the Urban Poor (DWUP) nahuman na sa pag-clear sa lugar sa mga obstruction. Matud sa operations head sa DWUP Genevieve Alcoseba milanat og duha ka semana una ang ilang team hingpit nga nakalimpiyo sa mga barrier sa lugar. Si Alcoseba nagkanayon nga kasagaran sa mga biktima sa sunog naa sa luna nga iyaha sa Siyudad sa Sugbo ug gamay lang ang naa sa pribadong luna.
Kadtong mga naa sa pribadong luna ubos gihapon sila sa subdivision plan pasabot niini ang DWUP moobserba sa saktong sukod sa luna.
Matud usab ni Alcoseba nga posibleng ang mga biktima sa sunog dili makatukod og balik sa ilang mga estraktura nga dunay samang sukod.
Sa pag-implementar sa re-blocking kini nagpasabot nga mo obserba sa 6.5 meter road distance ug pathways nga tulo ka metros ang gilapdon. “Dili na gyud sila mag-expect nga mahatag ang the same size sa kadtong wa pa sila nasunog kay naa na may adjustment, naghimo naman ta og karsada gyud’, matud ni Alcoseba.
Niadtong Disyembre 25 sa niaging tuig usa ka dakong sunog ang niigo sa pito ka sitio sa Barangay Duljo-Fatima nga naglangkub sa Buli, Mansinitas, Catwalk, San Pedro, Plastikan, Pasong Kabayo ug Punyang.
Niabot sa 659 ka pamilya, 2,700 ka indibidwal ang apektado sa maong sunog kinsa kasamtangang nipasilong sa first three floors sa Duljo-Fatima Barangay Hall ug San Nicolas Elementary School. BDB, (BANAT NEWS)
- Latest
